सात वर्षपछि आफ्नै भवनबाट सेवा दिँदै जीतपुरसिमरा वडा नं. १ को कार्यालय
सिमराः जीतपुरसिमरा उपमहानगरपालिका वडा नं. १ को कार्यालयले सोमबारदेखि आफ्नै नवनिर्मित भवनबाट सेवा प्रवाह गर्ने भएको छ । हालसम्म भाडाको घरमा संचालन हुँदै आएको वडा कार्यालय अब आफ्नै भवनमा सर्न लागेको हो ।
वडा नं. १ का वडाध्यक्ष हिराबहादुर गुरुङले एक सूचना जारी गर्दै असार ३१ गतेदेखि वडा कार्यालयको सेवा प्रवाह नयाँ भवनबाट हुने जनाएका छन् । उनले नेपाल अपांग सेवा संघ र मनोकामना मन्दिरको बीचमा निर्माण भएको भवनबाट सेवा प्रवाह हुने सूचना जारी गरेका छन् ।
यसअघि सिमरा र पथलैयाको बीचमा पर्ने हुलासस्थित एक घरमा वडा कार्यालय संचालन हुँदै आएको थियो । २०७४ सालमा पहिलो पटक भएको स्थानीय तहको निर्वाचनपछि पथलैया र सिमराका नागरिकलाई पायक पर्ने गरी हुलासमा कार्यालय स्थापना गरिएको थियो ।
