पेस्तोलसहित तीन जना बारा प्रहरीको नियन्त्रणमा
सिमराः बारा प्रहरीले कटुवा पेस्तोलसहित तीन जनालाई नियन्त्रणमा लिएको छ । महागढीमाई नगरपालिका ११ मधुरीजब्दीमा जमिनमुनी गाडेर राखेको पेस्तोलसहित प्रहरीले तीन जनालाई नियन्त्रणमा लिएको हो ।
जिल्ला प्रहरी कार्यालय बाराका प्रहरी प्रवक्ता एवम् प्रहरी नायब उपरीक्षक दधिराम न्यौपानेका अनुसार पक्राउ पर्नेमा महागढीमाई नगरपालिका ११ मधुरीजब्दीका ५५ वर्षीय रमजान अंसारी, २५ वर्षीय सुल्तान अंसारी र ४५ वर्षीय रामकृपाल साह रहेका छन् । उनिहरुलाई पक्राउ गरिएको कारण भने प्रहरीले खुलाएको छैन ।
मधुरीजब्दीस्थित अंसारीको आँपको बगैंचामा जमिनमुनी गाँडेर राखेको अवस्थामा कटुवा पेस्तोल बरामद भएको र सो कार्यमा संलग्न रहेको आरोपमा तीन जनालाई अनुसन्धानका लागि नियन्त्रणमा लिइएको प्रहरी उपरीक्षक न्यौपानेले जानकारी दिए । न्यौपानेका अनुसार पक्राउ परेकामाथि अनुसन्धान भईरहेको छ ।
