विद्यार्थी बोक्ने स्कुल बसबाट भन्सार छलीका सामान बरामद
सिमरा: बाराको परवानीपुरस्थित दिल्ली पब्लिक स्कुलको बसबाट सशस्त्र प्रहरीले शुक्रबार भन्सार छलीका सामान नियन्त्रणमा लिएको छ । प्रस्तावित सीमा सुरक्षा गुल्म वीरगञ्ज भन्सारबाट अवैध रूपमा ल्याइएको दुई लाख त्रिसट्ठी हजार बराबरको सामग्री सशस्त्र प्रहरीले बरामद गरेको हो ।
सशस्त्र प्रहरी बल नेपाल १३ हेडक्वाटर प्रवक्ता सशस्त्र प्रहरी नायब उपरीक्षक देवेन्द्रबहादुर सिंहले दिल्ली पब्लिक स्कुलको प्रदेश २–०३–००१ क ०११६ को बस आफ्ना स्कुलमा अध्ययनरत विद्यार्थीलाई सीमावर्ती क्षेत्र भारत रक्सौलमा छोडेर फर्किने क्रममा चेकजाँच गर्दा सो परिमाणको सामग्री बरामद भएको बताए ।
सशस्त्र प्रहरी नायब उपरीक्षक सिंहले बरामद गरिएको समान र बसचालकलाई नियन्त्रणमा लिएको जानकारी दिए ।
