मोटरसाइकल दुर्घटनामा प्रहरी जवानको मृत्यु
सिमरा: रौतहटको चन्द्रपुर नगरपालिका–६ स्थित तल्लोबजारमा आइतबार मोटरसाइकल दुर्घटना हुँदा एक प्रहरी जवानको मृत्यु भएको छ । मोटरसाइकलको पछाडि सवार अर्को व्यक्ति भने घाइते भएका छन् ।
चन्द्रनिगाहपुरबाट सन्तपुरतर्फ जाँदै गरेको मधेस प्रदेश ०३–०३३ प ३३०१ नम्बरको मोटरसाइकल अनियन्त्रित हुदाँ २६ वर्र्षीय प्रहरी जवान नविन कुमार यादवको निधन भएको हो । यादव दुर्घटनामा गम्भीर घाइते भएका थिए । उनलाई तत्कालै चन्द्रनिगाहपुरस्थित हाइवे ट्रमा अस्पतालमा उपचारका लागि लगिएको थियो । उपचारको क्रममा मृत्यु भएको इलाका प्रहरी कार्यालय चन्द्रनिगाहपुरले जनाएको छ ।
प्रहरी जवान यादव बारास्थित अस्थायी प्रहरी चौकी लँगडा चोकमा कार्यरत थिए । कार्यालयको काम विशेषले रौतहट गएका बेला उनि दुर्घटनामा परेका हुन् ।
दुर्घटनामा मोटरसाइकलको पछाडि सवार २५ वर्र्षीय नविनकुमार चौधरी घाइते भएका छन् । उनको बायाँ खुट्टामा चोट लागेको छ । उनको अवस्था सामान्य रहेको प्रहरीले जनाएको छ ।
मृतक यादवको शव पोस्टमार्टमका लागि चन्द्रनिगाहपुर अस्पतालमा राखिएको छ । दुर्घटनाबारे थप अनुसन्धान जारी रहेको इलाका प्रहरी कार्यालय चन्द्रनिगाहपुरका डिएसपी राजकुमार राईले जानकारी दिए ।
