यती एयरले पायो हवाई सुरक्षाको आईएसएसए प्रमाणपत्र, सिमरा–काठमाडौं रुटमा विमान थप हुँदै
सिमराः निजी वायुसेवा कम्पनी यती एयरलाइन्सले ‘इन्टरनेसनल एयर ट्रान्सपोर्ट एसोसिएसन (आएटा)’ को ‘स्ट्यान्डर्ड सेफ्टी एसेसमेन्ट (आईएसएसए)’ कार्यक्रमको मापदण्ड हासिल गरेको छ । उड्डयन क्षेत्रमा आईएसएसएको यो प्रमाणपत्र उत्कृष्ट हवाई सुरक्षा कायम गर्ने वायुसेवालाई मात्र प्रदान गर्ने गरिन्छ ।
आईएसएसए कार्यक्रमले प्रमाणपत्र प्रदान गर्नुपूर्व वायुसेवा सञ्चालकको सुरक्षा व्यवस्थापन प्रणाली सुक्ष्म ढंगले मूल्यांकन र विश्वव्यापी मापदण्डका प्रत्येक आवश्यकता कार्यान्वयन भएनभएको हेर्ने गर्छ । सो मापदण्ड पूरा गरेका कारण यतिलाई आईएसएसए अपरेटरको मान्यता दिइएको हो ।
आईएसएसए प्रमाणपत्रले थप जिम्मेवार बनाएको जनाउँदै यति व्यवस्थापनले व्यापार विस्तार क्रममा हवाई सुरक्षालाई उच्च प्राथमिकतामा राखी यात्रको सन्तुष्टि कायम राख्न प्रतिबद्ध हुने जनाएको छ । त्यसैले विश्वव्यापी उड्डयन सुरक्षा मापदण्ड पूरा गरी अत्याधुनिक प्रविधि, प्रशिक्षण कार्यक्रम र सुरक्षा व्यवस्थापन प्रणालीमा लगानी गरेको यति व्यवस्थापनको भनाई छ ।
यति एयरलाइन्सका प्रमुख कार्यकारी अधिकृत सुभाष सापकोटाले आईएसएसएको प्रमाणपत्रले खुशी थप्नुका साथै थप जिम्मेवार बनाएको बताए । उनले हवाई सुरक्षा र परिचालन प्रक्रियाको गुणस्तर बढाउने प्रयासमा महत्त्वपूर्ण उपलब्धिका रुपमा आईएसएसए प्रमाणपत्रलाई लिएको सापकोटाको भनाई छ ।
यता सिमरा–काठमाडौं रुटमा यति एयरलाइन्सले एउटा उडान थप गर्ने तयारी गरिरहेको छ । सिमरा विमानस्थलबाट दुईवटा उडान गर्दै आएको यति एअरलाईन्सले एउटा उडान थप गर्ने तयारी गरिरहेको हो ।
एअरलाइन्सको सिमरास्थित कार्यालय प्रमुख दामोदर तिवारीले दशैं अगाडि एटिआर ७२ को अर्को एउटा उडान थप हुने जानकारी दिए । यसअघि पनि एटिआर ७२ का दुई विमानले सेवा दिदै आएको थियो ।
