रौतहटमा खुकुरी प्रहारबाट एक जना घाईते
सिमराः रौतहटको गढिमाई नगरपालिका–१ समनपुरमा खुकुरी प्रहारबाट एक जना घाईते भएका छन् ।
घाईते हुनेमा ३५ वर्षीय चन्दन साह रहेका छन् । गरुडा नगरपालिका–९ नरकटिया गाउँदेखि दक्षिणतर्फ एक किलोमिटरको दूरीमा अज्ञात व्यक्तिले आक्रमण गर्दा ३५ वर्षीय साह घाईते भएका हुन् ।
जिल्ला प्रहरी कार्यालय रौतहटका अनुसार साह आफ्नो मोटरसाइकलमा सवार भई गरुडाबाट समनपुरतर्फ गइरहेका बेला नाम र पहिचान नखुलेका व्यक्तिले उनलाई घेरा हालेर टाउको को पछाडि भाग र बायाँ हातमा खुकुरी प्रहार गरेका थिए । साहले प्रतिकार गर्दै चिच्याएपछि आक्रमणकारी भागेका थिए ।
साहलाई तत्काल उपचारका लागि गरुडास्थित सरस्वती अस्पतालमा भर्ना गरिएको छ । उनको अवस्था गम्भीर रहेको र हालसम्म बोल्न नसक्ने अवस्थामा रहेको परिवारजनले जानकारी दिएका छन् ।
संलग्न व्यक्तिको पहिचान खुल्न नसकेको र घटनाबारे अनुसन्धान भइरहेको जिल्ला प्रहरी कार्यालय रौतहटका प्रवक्ता डिएसपी दिपक कुमार रायले जानकारी दिएका छन् ।
