महोत्तरीमा जलाइएको अवस्थामा महिलाको शव फेला
सिमराः महोत्तरीको पिपरा गाउँपालिका ७ स्थित दनौलीमा सोमबार दिउँसो एक महिलाको शव फेला परेको छ ।
महोत्तरी प्रहरीका अनुसार अनुहार जलाइएको अवस्थामा अन्दाजी २६ वर्षीय महिलाको शव फेला परेको हो । कालो लेगिज र हल्का पहेलो रंगको कुर्ती लगाएकी महिलाको शव स्थानीय अशोक ठाकुरको आँपको बगैँचा नजिकै शव भेटिएको हो ।
महिलाको जलाएर हत्या गरेको हुनसक्ने महोत्तरी प्रहरीका प्रहरी नायब उपरीक्षक सन्तुलाल जयसवारको आंकलन छ । स्थानीयले शव देखेपछि प्रहरीलाई खबर गरेका थिए । शव पोस्टमार्टमका लागि प्रादेशिक अस्पताल जलेश्वर लगिएको छ ।
मृतकको पहिचान खुल्न नसकेपछि अनुसन्धानमा सहजताका लागि कुकुरको समेत परिचालन गरिएको महोत्तरी प्रहरीले जनाएको छ ।
