नितनपुरमा सुमो दुर्घटना हुदाँ एक बालकको मृत्यु, आठ घाइते
सिमराः बाराको नितनपुरमा सोमबार बिहान टाटा सुमो दुर्घटना हुदाँ एक बालकको मृत्यु भएको छ । दुर्घटनामा अन्य आठ जना घाइते भएका छन् ।
काठमाडौंबाट वीरगन्जतर्फ जाँदै गरेको ना१ज ४४२८ नम्बरको टाटा सुमो जीतपुरसिमरा उपमहानगरपालिका १० नितनपुरमा अनियन्त्रित भई दुर्घटना भएको हो । सुमोमा सवार रहेका भारत बिहार मोतिहारी थाना सुगौली रक्सौलका नविन कुमार साहका चार वर्षीय छोरा अनमोलकुमार साहको मृत्यु भएको ईलाका प्रहरी कार्यालय सिमराका प्रहरी नायब उपरीक्षक चिरिञ्जिवी दहालले जानकारी दिए ।
बालकको वीरगन्जस्थित बयोधा मेडिसिटी अस्पतालमा उपचारको क्रममा मृत्यु भएको हो । दुर्घटनामा घाईते भएका आठ जनाको बयोधा मेडिसिटी अस्पतालमा उपचार भइरहेको प्रहरीले जनाएको छ ।
