यु–१९ कप्तान पूजा बनिन् जनकपुर बोल्ट्सको ‘फेस अफ दि बोल्ट्स’
सिमराः महिला यु–१९ राष्ट्रिय टोलीकी कप्तान पूजा महतो नेपाल प्रिमियर लिगको फ्रेन्चाइज जनकपुर बोल्ट्सको ‘फेस अफ दि बोल्ट्स’ बनेकी छिन् ।
जनकपुरमा सोमबार आयोजित कार्यक्रममा जनकपुर बोल्ट्सले पूजालाई आफ्नो टिमको ‘फेस अफ दि बोल्ट्स’ घोषणा गरेको हो । सो कार्यक्रममा जनकपुर बोल्ट्सले पूजालाई ५० हजार नगदसहित सम्मान समेत गरेको छ ।
पूजाको कप्तानीमा रहेको यु–१९ राष्ट्रिय महिला टोलीले एशियाबाट छनौट हुँदै विश्वकपको यात्रा तय गरेको थियो । एशिया छनौटमा उत्कृष्ट प्रदर्शन गरेकी महोत्तरीकी पूजालाई जनकपुर बोल्ट्सले ‘फेस अफ दि बोल्ट्स’ मार्फत टिममा समावेश गरेको हो ।
जनकपुर बोल्ट्सको मार्की प्लेयरमा वीरगन्जका आशिफ शेख छन् भने नेपाली राष्ट्रिय टोलीका पूर्व प्रशिक्षक पुबुदु दासानायके टिमको मुख्य प्रशिक्षक छन् । बाराका अनिल साह पनि जनकपुर बोल्ट्समै आवद्ध छन् ।
