जनकपुर बोल्ट्सको जर्सी सार्वजनिक
सिमराः नेपाल प्रिमियर लिग (एनपीएल) को फ्रेन्चाइज जनकपुर बोल्ट्सले आफ्नो जर्सी सार्वजनिक गरेको छ । जनकपुरमा आयोजित एक कार्यक्रममा जनकपुर बोल्ट्सले जर्सी सार्वजनिक गरेको हो ।
मधेश सरकारका खेलकुद तथा समाज कल्याण मन्त्री प्रमोद जयसवाल र मार्की प्लेयर आशिफ शेखले जर्सी सार्वजनिक गरेका हुन् । जनकपुर बोल्ट्सले महिला यु–१९ राष्ट्रिय टोलीकी कप्तान पूजा महतोलाई ‘फेस अफ दि बोल्ट्स’ बनाएको छ । जर्सी सार्वजनिक कार्यक्रममा पूजालाई ‘फेस अफ दि बोल्ट्स’ घोषणा गर्दै ५० हजार नगदसहित सम्मान समेत गरेको छ ।
जनकपुर बोल्ट्सको मार्की प्लेयरमा वीरगन्जका आशिफ शेख छन् भने नेपाली राष्ट्रिय टोलीका पूर्व प्रशिक्षक पुबुदु दासानायके टिमको मुख्य प्रशिक्षक छन् । बाराका अनिल साह पनि जनकपुर बोल्ट्समै आवद्ध छन् ।
