रौतहटमा स्कारपियो दुर्घटना हुँदा आठ जनाको मृत्यु, पाँच जना घाइते
सिमराः रौतहटमा गएराति स्कारपियो गाडी दुर्घटना हुँदा ८ जनाको मृत्यु भएको छ भने पाँच जना घाइते भएका छन् ।
पूर्वपश्चिम राजमार्ग अन्तर्गत चन्द्रपुर नगरपालिका–४ धन्सार पुल नजिकैको जंगलमा निजगढबाट चपुरतर्फ आउँदै गरेको बा१६च ३१६२ नं. को स्कारपियो दुर्घटना भएको जिल्ला प्रहरी कार्यालय रौतहटका प्रमुख प्रहरी उपरीक्षक दिलिप घिमिरेले जानकारी दिए ।
बाराको गढीमाई मेलामा सहभागी भएर सिराहा फर्कदै गरेका दर्शनार्थी चढेको स्कर्पियो जिप राति करिब १ बजे अनियन्त्रित भइ रुखमा ठोक्किँएर तल खसेको थियो ।
दुर्घटनामा मृत्यु धएका सिरहाको अर्नमा गाउँपालिका–३ बंठियाटोलका ६० वर्षीय लरुवतीदेवी महरा सोही ठाउँकी ३० वर्षीय उर्मिला महरा, ५० वर्षीय रामकुमारी महरा, ५५ वर्षीय महगींदेवी महरा, ६२ वर्षीय फुलमन्तिदेवी चमार, ६० वर्षीय रामकुमारीदेवी महरा, ३० वर्षीय सकुन्तलादेवी महरा र सोही गाउँपालिका–५ बलुवाटोलका ४० वर्षीय स्कारपियो चालक श्रीकुमार यादव रहेका छन् ।
दुर्घटनामा अर्नमा–३ की ३० वर्षीय राधा राम, सोही ठाउँका उमेश रामका २ वर्षीय छोरा आर्यन, २५ वर्षीय देवकुमारी महरा, उनका ७ वर्षीय छोरा रितिक महरा र अर्नमा–३ कै ६० वर्षीय कन्यादेवी महरा घाइते भएका छन् ।
घाईतेहरूको हाइवे ट्रमा सेन्टर अस्पताल र वीरगञ्जको बयोधा अस्पतालमा उपचार भइरहेको प्रहरीले जनाएको छ ।
