१५ किलो लागूऔषध गाँजासहित दुई भारतीय नागरिक पक्राउ
सिमराः प्रहरीले लागूऔषध गाँजासहित अमलेखगञ्जबाट दुई जनालाई पक्राउ गरेको छ । पक्राउ पर्ने दुबै जना भारतीय नागरिक रहेका छन् ।
हेटौंडाबाट सिमरातर्फ आउँदै गरेको भारतीय नम्बरको कारलाई अमलेखगञ्जमा जाँच गर्ने क्रममा प्रहरीले १५ किलो गाँजा बरामद गरेको थियो । सो क्रममा प्रहरीले कारमा सवार दुबै जनालाई नियन्त्रणमा लिएको जिल्ला प्रहरी कार्यालय बाराका निमित्त सूचना अधिकारी बलराम श्रेष्ठले जानकारी दिएका छन् ।
पक्राउ पर्नेमा कार चालक भारत पूर्वीचम्पारण मोतिहारीका २६ वर्षीय अखिलेशकुमार साह र कारमा सवार सोही ठाउँका १९ वर्षीय राजकुमार पासवान रहेका छन् । कारको सिट मुनी फल्स बटम बनाएर चार वटा पोकामा लुकाएर ल्याउँदै गरेको गाँजा बरामद भएको हो ।
पक्राउ परेका दुबै जनालाई हिरासतमा राखी अनुसन्धान भईरहेको निमित्त सूचना अधिकारी श्रेष्ठले जानकारी दिए ।
