पर्सा प्रहरीद्वारा अनाधिकृत रुपमा भण्डारण गरिएको लागूऔषध बरामद
सिमराः पर्सा प्रहरीले लागूऔषधसहित एक जनालाई पक्राउ गरेको छ । पक्राउ पर्नेमा वीरगन्ज महानगरपालिका वडा नम्बर १ बस्ने ३८ वर्षीय राजाराम महतो कोईरी रहेका छन् ।
प्रहरीले वीरगञ्ज ३ प्रगतिनगर टोलमा लागूऔषध खरिद बिक्री तथा अनाधिकृत रुपमा भण्डारण भइरहेको सूचना प्राप्त भएको आधारमा सृष्टि किराना जेनरल स्टोरमा छापामारेको थियो ।
कोइरीले सञ्चालन गरेको स्टोरबाट प्रहरीले ५ कार्टुनभित्र ट्रामाडोल हाइड्रोक्लोराइड क्याप्सुल ५० एमजीको प्रति प्याकेट तीनसयका दरले पाँच सय प्याकेट र खुल्ला १८६ पत्तामा एक हजार ८६० पिस ट्याब्लेट बरामद गरेकोे जिल्ला प्रहरी कार्यालयका डिएसपी किशोर लम्सालले जनाएका छन् ।
बरामद लागूऔषधको मूल्यांकन एक लाख ५१ हजार ८६० रुपैँया कायम गरिएको प्रहरीले जनाएको छ । पक्राउ परेकामाथि लागूऔषध सम्बन्धी कसूरमा थप अनुसन्धान भइरहेको जिल्ला प्रहरी कार्यालय पर्साले जानकारी दिएको छ ।
