पर्सा प्रहरीद्वारा जुवाखालबाट ६ जना पक्राउ
सिमराः पर्सा प्रहरीले जुवाखालबाट ६ जनालाई पक्राउ गरेको छ ।
पक्राउ पर्नेमा वीरगन्ज ११ का ४२ वर्षीय बिमल बहादुर क्षेत्री, सोही वडाका ५९ वर्षीय गणेश कुमार थापा, वडा नं ४ का ४६ वर्षीय धुरेन्द्र प्रसाद यादव, वडा नं. १७ का नरेश बहादुर सिंह पौडेल, सोहि वडाका ४५ वर्षीय जयराम प्रसाद र वडा नं. १३ का ३१ वर्षीय राम श्रेष्ठ रहेका प्रहरीले जनाएको छ ।
विशेष सूचनाको आधारमा प्रहरीले वीरगन्ज १३ बाट उनीहरुलाई पक्राउ गरेको हो । प्रहरीलाई स्थानीय सोनालाल कुशवाहाको पक्की घरको छतमा जुवा खेलिरहेको सूचना प्राप्त भएको थियो । सोही सूचनाको आधारमा उनीहरुलाई जुवाखालबाटै रंगेहात पक्राउ गरिएको प्रहरी नायब उपरीक्षक किशोर लम्सालले बताए ।
उनीहरुको साथबाट एक लाख ४५ हजार ५४० रुपैँयासहित ३ बुक तास समेत नियन्त्रणमा लिएको प्रहरीले जानकारी दिएको छ । पक्राउ परेकाहरुमाथि जुवा सम्बन्धी कसूरमा मुद्दा दर्ता गरी ७ दिनको म्याद थप गरी आवश्यक अनुसन्धान भइरहेको प्रहरीको जनाएको छ ।
