कलैया १ स्थित विद्यालयमा विज्ञान प्रयोगशालाको उद्घाटन, साढे तीन सय विद्यार्थीलाई जुत्तामोजा वितरण
सिमराः कलैया उपमहानगरपालिका १ स्थित नेपाल राष्ट्रिय नमूना माध्यमिक विद्यालयमा निर्मित विज्ञान प्रयोगशाला (साईन्स ल्याब) को एक कार्यक्रमकाबीच उद्घाटन गरिएको छ । उपमहानगरपालिकाका प्रमुख प्रशासकीय अधिकृत नाथु साहले ल्याबको उद्घाटन गरेका हुन् ।
उक्त ल्याब उपमहानगरपालिकाको कार्यालयले निर्माण गरेको हो । विद्यालयमा कक्षा ९ र १० मा अध्ययनरत विद्यार्थीले ल्याब प्रयोग गर्नेछन् ।
ल्याब उद्घाटनसंगै विद्यालयमा बालविकास देखी कक्षा १० सम्म अध्ययनरत करिब साढे तीन सय विद्यार्थीलाई जुत्ता र मोजा वितरण गरिएको छ । विद्यालय व्यवस्थापन समितीका अध्यक्ष अभिषेक साहको प्रयासमा विभिन्न दाताको सहयोगमा जुत्ता, मोजा, टाईबेल्ट वितरण गरिएको हो ।
कार्यक्रममा वडाध्यक्ष मोहनबहादुर क्षेत्री, रामेश्वर यादव, शिक्षा शाखा प्रमुख प्रलाद वर्णवाल, अधिकृत बिजय अधिकारी, नगर शिक्षा समितिका महमद सगिर, मनोज जयसवाल, वडा सदस्य शशी दास, विद्यालयका प्रध्यानाध्यापक रामनाथ मिश्र, अभियन्ता जीतेन्द्र यादवलगायत उपस्थित थिए ।
