रुम्बाको हत्यामा संलग्न रहेको आरोपमा दुई जना पक्राउ, आइतबार सार्वजनिक गरिदै
सिमराः बाराको सिमरा विमानस्थलमा कार्यरत नेपाल प्रहरीको कार्यालय सहयोगी राजकुमार रुम्बाको हत्यामा संलग्न रहेको आशंकामा प्रहरीले दुई जनालाई पक्राउ गरेको छ ।
एक साताको अनुसन्धानपछि प्रहरीले घटनामा संलग्न रहेको आशंकामा दुई जनालाई पक्राउ गरेको हो । पक्राउ परेका व्यक्तिले घटनामा आफ्नो संलग्नता रहेको बयान दिएको प्रहरीको भनाई छ ।
प्रहरीले पक्राउ परेका व्यक्तिको पहिचान खुलाएको छैन । अनुसन्धान अन्तिम चरणमा रहेकाले उनिहरुको नाम प्रहरीले गोप्य राखेको छ । पक्राउ परेकामध्ये एक जनाको कोठाबाट रुम्बाको पर्स र सिक्री फेला परेको बताइएको छ । पक्राउ परेका व्यक्तिलाई आइतबार सार्वजनिक गर्ने तयारी रहेको ईलाका प्रहरी कार्यालय सिमराका प्रहरी नायब उपरीक्षक चिरिञ्जिवी दाहालले जानकारी दिए ।
जीतपुरसिमरा १७ घर भएका रुम्बा सिमरा विमानस्थलमा सुरक्षागार्डका रुपमा कार्यरत थिए । उनको शव पुष ७ गते बिहान जीतपुरसिमरा उपमहानगरपालिका ११ स्थित आमाडारको पुलनजिक कारभित्र फेला परेको थियो ।
कारको चालक बस्ने सिटमा मृत भेटिएका रुम्बालाई गोली हानेर हत्या गरिएको पुष्टि भईसकेको छ । उनको टाउकोमा गोली लागेको शल्यपरिक्षण रिपोर्टमा देखिएको छ ।
सिमरा विमानस्थलबाट शनिबार राती राष्ट्रिय अनुसन्धान विभागका अनुसन्धान अधिकृत श्रीकान्त तिवारीको बागमती प्रदेश ०१–०२८च ७६१६ नम्बरको कार लिएर निस्किएका थिए । घटनालगत्तै प्रहरीले अनुसन्धान अधिकृत तिवारीसंग समेत सोधपुछ गरेको थियो ।
