पर्सामा खुर्सानीको बोराभित्र लुकाएर ल्याउँदै गरेको लागुऔषधसहित एक जना पक्राउ
सिमराः पर्सामा सशस्त्र प्रहरीले सोमबार खुर्सानीको बोरामा लुकाएर ल्याउँदै गरेको लागुऔषधसहित एक जनालाई पक्राउ गरेको छ ।
पक्राउ पर्नेमा बहुदरमाई गाउँपालिका ३ नगरदाहा बस्ने ३६ वर्षीय मिश्री राम रहेका छन् । उनलाई सशस्त्र प्रहरी बल नेपाल प्रस्तावित सीमा सुरक्षा गुल्म वीरगंजले नियन्त्रणमा लिएको हो ।
वीरगन्ज महानगरपालिका १६ भन्सार ईलाकामा भारतबाट पैदल आउँदै गर्दा उनले टाउकोमा बोकेको हरियो खुर्सानीको बोराभित्र डाइजेपाम ४९० एम्पुल, बुप्रेनोर्फिन ४९९ एम्पुल, नोफिन २९७ एम्पुल र प्रोमाथाजिन हाइड्रोक्लोराई इन्जेक्सन ४९७ एम्पुल फेला बरामद भएको सहप्रवक्ता एवं डिएसपी शैलेन्द्र थापाले जानकारी दिए ।
नियन्त्रणमा लिएका उनलाई बरामद लागूऔषधसहित आवश्यक कारबाहीका लागि प्रहरी कार्यालयमा पठाईएको डिएसपी थापाले बताए ।
