उखु बोकेको ट्रयाक्टरमा मोटरसाइकल ठोक्किँदा दुईको मृत्यु
सिमराः सर्लाहीको बरहथवा नगरपालिका ९ शान्ति चोकमा सोमबार राति उखु बोकेको ट्रयाक्टर र मोटरसाइकल एकआपसमा आपसमा ठोक्किँदा दुई जनाको मृत्यु भएको छ ।
मृत्यु हुनेमा मोटरसाइकल चालक बरहथवा–५ राजुचोकका हरिन्द्र महतो र सोही स्थानका पुरुषोत्तम दास रहेको जिल्ला प्रहरी प्रवक्ता प्रहरी नायब उपरीक्षक दीपक श्रेष्ठले जानकारी दिए ।
बरहथवाबाट उखु बोकेर हरिवनतर्फ आउँदै गरेको ज१त ९८७६ नम्बरको ट्रयाक्टर र नयाँ रोडबाट बरहथवातर्फ जाँदै गरेको ज४प ३७७ नम्बरको मोटरसाइकल एकआपसमा ठोक्किँदा दुर्घटना भएको प्रहरीले जनाएको छ ।
दुर्घटनामा घाईते भएका उनिहरुलाई उपचारकालागी अस्पताल पुर्याईएको थियो । महतोको बरहथवास्थित एडभान्स सञ्जीवनी अस्पतालमा र दासको बयोधा अस्पताल वीरगञ्जमा उपचारका क्रममा मृत्यु भएको प्रहरीले जनाएको छ ।
प्रहरीले दुर्घटनामा संलग्न ट्याक्टर र त्यसका चालक बलरा नगरपालिका ७ बस्ने ३८ वर्षीय वीरेन्द्र महतोलाई नियन्त्रणमा लिएको छ ।
