जय ट्रफी एलिट कपः पुलिसका दुवै ओपनर शून्यमा आउट, २५ रनमै गुमायो चार विकेट
वीरगन्जः जय ट्रफी एलिट कप क्रिकेट प्रतियोगिता अन्तर्गत वीरगन्जमा भईरहेको खेलमा नेपाल आर्मी क्लबविरुद्ध जवाफी ब्याटिङमा उत्रिएको नेपाल पुलिस क्लबले २५ रनमै चार विकेट गुमाएको छ ।
नारायणी क्रिकेट रंगशालामा जारी खेलमा पुलिसका ओपनर कुशल भुर्तेल र अर्जुन साउद शून्य रनमै आउट भए । कुशललाई सोमपाल कामी र अर्जुनलाई साहब आलमले निराश पारेका थिए । आलमले पुलिसका अमृत श्रेष्ठ र कप्तान आरिफ शेखलाई आउट गरेका छन् ।
पुलिसले यो समाचार तयार पार्दा ९.२ ओभरमा चार विकेट गुमाउँदै ४१ रन जोडेको छ । पुलिसका दिपिल नाथ सात र रसिद खान १० रन बनाएर खेलिरहेका छन् ।
यसअघि टस हारेर ब्याटिङ गरेको आर्मीले ३४.४ ओभरमा सबै विकेट गुमाउँदै एक सय २१ रन जोडेको थियो । आर्मीलाई कम स्कोरमै रोक्ने क्रममा पुलिस क्लबका ललित राजवंशीले आकर्षक बलिङ गरे । ललितले १४.४ ओभर बलिङ गर्दै आर्मी दुवै ओपनरसहित सात विकेट लिए ।
ललितले ओपनर सन्तोष कार्कीलाई एक सोमपाल कामीलाई पाँच, त्रितराज दासलाई शून्य, बशिर अहमदलाई १२, विवेक यादवलाई शून्य, साहब आलमलाई ११ र आकाश चन्दलाई शून्यमा आउट गरेका थिए । पुलिसका कुशल भुर्तेल, सरवन यादव र रसिद खाले एक/एक विकेट लिए ।
आर्मीका कुशल मल्लले २५, भिम सार्कीले २२, कप्तान विनोद भण्डारीले २१, बशिर अहमदले १२, साहब आलमले ११ र पवन कार्कीले अविजित १५ रन बनाएका थिए ।
