पर्सामा हजुरबुवाको हत्या गरेको आरोपमा नातिनातिनी पक्राउ
सिमराः हजुरबुवाको हत्या गरेको आरोपमा पर्सा प्रहरीले नातिनातिनीलाई पक्राउ गरेको छ। पक्राउ पर्नेमा पोखरिया नगरपालिका ८ जगतपुर बस्ने २० वर्षीय खुश्बु खातुन र १८ वर्षीय काबुल देवान रहेका छन्।
उनिहरुमाथि ८० वर्षीय हजुरबुवा रामजान देवानलाई कुटपिट गरी हत्या गरेको आरोप छ । घरायसी विवादको क्रममा घाइते भएका रामजानलाई वीरगञ्ज हेल्थ केयर हुँदै न्युरो अस्पताल वीरगञ्ज पुर्याइएको थियो । उपचारको क्रममा देवानको मंगलबार बिहान मृत्यु भएको पर्सा प्रहरी प्रवक्ता एवम् प्रहरी नायब उपरीक्षक किशोर लम्सालले जानकारी दिए ।
प्रहरीका अनुसार घरमा वाइफाईको विषयमा सामान्य विवाद हुँदा नातिनातिनीले हजुरबुवालाई कुटपिट गरेको आरोप छ । प्रवक्ता लम्सालले घटनाको अनुसन्धान भईरहेको जानकारी दिएका छन् ।
