जय ट्रफीः बागमतीविरुद्ध आर्मीले बनायो २७६ रन, इमरान र बशिरले बनाए अर्धशतक
जनकपुर: जय ट्रफी मेन्स एलिट कप क्रिकेट प्रतियोगिता अन्तर्गत जनकपुरमा जारी खेलमा नेपाल आर्मी क्लबले बागमती प्रदेशविरुद्ध दुई सय ७६ रन बनाएको छ ।
जनकपुरको रामजानकी मल्टीपर्पोज रंगशालामा टस हारेर व्याटिङ गर्न आएको आर्मीले निर्धारित ६० ओभर पूरा खेल्दै पाँच विकेटको क्षतिमा दुई सय ७६ रन जोडेको हो ।
बागमतीविरुद्ध बलियो स्कोर बनाउने क्रममा आर्मीका इमरान शेखले ७२ र बसिर अहमदले ५३ रन बनाउँदै अर्धशतक पूरा गरे । यसैगरी आर्मीका लागि त्रितराज दासले ४४, कुशल मल्लले ३३, भीम सार्कीले ३२ रन बनाए ।
बागमतीका बिपिन आचार्यले तीन र सन्दीप लामिछानेले दुई विकेट लिए । सन्दीपले २२ ओभर बलिङ गर्दै एक सय तीन रन खर्चिएर दुई विकेट लिएका थिए । यसैगरी बिपिनले १३ ओभरमा ४५ रन खर्चिएर तीन विकेट हात पारेका हुन् ।
आर्मीको इनिङ्स समाप्ति भएसंगै बागमती ब्याटिङमा उत्रिएको छ । यो समाचार तयार पार्दासम्म बागमतीले १० ओभरमा तीन विकेट गुमाउँदै ४६ रन बनाएको छ ।
बागमतीका रित गौतमले २१ र आशुतोष घिरइयाले ११ रन बनाए । आर्मीका आकाश चन्दले दुई र सोमपाल कामीले एक विकेट लिएका छन् ।
