जय ट्रफीः नन्दनले बनाए बागमतीका लागि पहिलो अर्धशतक
जनकपुरः जय ट्रफी पुरुष एलिट कप क्रिकेट प्रतियोगितामा बागमतीका अलराउण्डर नन्दन यादवले अर्धशतक प्रहार गरेका छन् । जनकपुरस्थित रामजानकी मल्टीपर्पोज रंगशालामा जारी खेलमा नन्दनले नेपाल आर्मी क्लबविरुद्ध ८० बलमा ५१ रन बनाएका हुन् ।
नन्दनले बनाएको यो अर्धशतक प्रतियोगिताकै छैठौं र बागमतीका लागि पहिलो हो । यसअघि आर्मीका सोमपाल कामी, इमरान शेख, बशिर अहमद, मधेशका मयन यादव र नेपाल पुलिस क्लबका कुशल भुर्तेलले अर्धशतक बनाईसकेका छन् । मधेशका मयन यादवले प्रतियोगितामा एक शतक समेत प्रहार गरिसकेका छन् ।
बागमतीका लागि पहिलो अर्धशतक प्रहार गरेका नन्दनले यसअघि पहिलो खेलमा मधेश प्रदेशविरुद्ध ४७ रन बनाएका थिए । कर्णाली याक्सबाट नेपाल प्रिमियर लिग खेलेका नन्दन पछिल्लो समय अष्ट्रेलियामा रहेर क्रिकेट खेल्दै आएका छन् ।
