लायन्स क्लबद्वारा जीतपुरस्थित गौशालामा पशुचौपायाका लागि आहार सहयोग
सिमराः मेलवीन जयन्तीको अवसरमा लायन्स क्लब जीतपुरसिमरा र लायन्स क्लब यूथको संयुक्त आयोजनामा जीतपुरस्थित गौशालाका पशुचौपायाका लागि आहार सहयोग गरिएको छ । गौशालामा रहेका पशुचौपायाको पोषणका लागि करिब सात हजार पाँच सय रुपैयाँ बराबरको आहार सहयोग गरिएको हो ।
कार्यक्रममा लायन्स क्लब जीतपुरसिमराका अध्यक्ष यज्ञबहादुर आले र लायन्स क्लब यूथका अध्यक्ष दीपक गुप्ताको अगुवाइमा गौशालाका गाईहरूलाई आहार सहयोग गरिएको थियो ।
गौशालामा आयोजित कार्यक्रममा मुकुन्द बहादुर क्षेत्री, नारायणी रायमाझी, कृष्णव्रत सिंह, सञ्जयकुमार साह र अजय विश्वकर्मालगायतको उपस्थिति रहेको थियो ।
लायन्स क्लबका सदस्यहरुले मेलवीन जयन्तीको अवसरलाई सामाजिक सेवामा समर्पण गर्दै गौ संरक्षणमा योगदान दिन पाएकोमा खुशी व्यक्त गरेका छन् ।
