रौतहटमा कीटनाशक औषधि बोकेको गाडी र गहुँ लोड गरिएको ट्याक्टर बरामद
सिमराः रौतहट प्रहरीले बिहिवार राती कीटनाशक औषधि बोकेको पिकअप गाडी र गहुँ बोकेको ट्याक्टरसहित दुई जनालाई नियन्त्रणमा लिएको छ ।
गहुँ बोकेको ट्याक्टरका चालक ४५ वर्षीय सञ्जीव यादव र कीटनाशक औषधि बोकेको पिकअपका चालक ३० वर्षीय सुनिल यादवलाई प्रहरीले नियन्त्रणमा लिएको हो ।
जिल्ला प्रहरी कार्यालय गौरकोे गस्ती टोलीले गौर नगरपालिकास्थित सिया पैलेस होटल अगाडी गहुँ बोकेको ट्याक्टर ना २ त १६५० र कीटनाशक औषधि बोकेको पिकअप ना २ त ७७६१ नम्बरको गाडीलाई जाँच गर्दा बिलबिजक र सामान फरक रहेको भन्दै दुवै गाडी नियन्त्रणमा लिएको हो ।
उक्त गाडीचालकसहित सामानलाई नियन्त्रणमा लिई आवश्यक अनुसन्धानका लागी आन्तरिक राजश्व कार्यालय, बारा पथलैया पठाइएको जिल्ला प्रहरी कार्यालय गौरका सहप्रवक्ता इन्स्पेक्टर उमाशंकर प्रसादले जनाएको छ ।
