पर्सा प्रहरीद्वारा श्रोत नखुलेको ६ लाख नगदसहित एक जना पक्राउ
सिमराः पर्सा प्रहरीले श्रोत नखुलेको ६ लाख नगदसहित एक जनालाई पक्राउ गरेको छ ।
पक्राउ पर्नेमा भारत विहार पूर्वी चम्पारण जिल्ला मोतीहारी थाना रक्सौल वडा नं. १४ का २७ वर्षीय ओम कुमार रौनियार रहेका छन् ।
विशेष सुचनाको आधारमा वडा प्रहरी कार्यालय विर्ताबाट खटिएको प्रहरी टोलीले वीरगञ्ज महानगरपालिका वडा नम्बर १० आदर्शनगरमा बिआर ०५ क्यु ४३८४ नम्बरको सुपर स्पलेण्डर मोटरसाइकल रोकेर जाँच गर्दा मोटरसाइकलको लेगार्डमा गोल्ड प्रिमियम जिरा राईस लेखिएको प्लाष्टिकको बोराभित्र लुकाईछिपाई राखिएको रकम फेला परेको पर्साका प्रवक्ता प्रहरी नायब उपरीक्षक किशोर लम्सालले जानकारी दिए ।
प्रहरीका अनुसार बोराबाट नेपाली पाच सय दरका नोट १२ सय थान गरी जम्मा ६ लाख रकम फेला परेको हो ।
पक्राउ परेका रौनियारलाई नियन्त्रणमा लिएर मुलुकी अपराध संहिता २०७४ को दफा १२५ को (क) बमोजिम कसूरमा थप अनुसन्धान भइरहेको प्रहरी नायब उपरीक्षक लम्सालले बताए ।
