अमलेखगञ्जमा निःशुल्क आँखा र दन्त शिविर सम्पन्न, १५ जनामा देखियो मोतियाबिन्दु
सिमराः जीतपुरसिमरा उपमहानगरपालिका वडा नं. २१ स्थित अमलेखगञ्जमा शनिबार निःशुल्क आँखा तथा दन्त परीक्षण शिविर सम्पन्न भएको छ ।
समुदाय प्रहरी साझेदारी कार्यक्रम अन्तर्गत इलाका प्रहरी कार्यालय अमलेखगञ्ज र लायन्स क्लब अफ अमलेखगञ्जको सहकार्यमा वडा नं. २१ को कार्यालयले शिविरको आयोजना गरेको हो । शिविरमा वीरगन्ज सामुदायिक आँखा केन्द्रले प्राविधिक सहयोग गरेको थियो ।
वडा कार्यालयमा आयोजित शिविरमा ८० जनाको आँखा परीक्षण गरिएको र परीक्षण गरिएका मध्ये १५ जनामा मोतियाबिन्दुको समस्या देखिएको वडाध्यक्ष सुवास श्रेष्ठले जानकारी दिएका छन् । मोतियाबिन्दु देखिएका बिरामीको मंगलबार निःशुल्क शल्यक्रिया गरिने समेत वडाध्यक्ष श्रेष्ठले बताए ।
शिविरमा मेडिकल संयोजक डा. महेश सिंह धामीको नेतृत्वमा रहेको टोलीले आँखा परीक्षण गरेको थियो । शिविर उद्घाटन कार्यक्रममा ईलाका प्रहरी कार्यालय अमलेखगञ्जका प्रहरी बरिष्ठ नायब निरीक्षक टेकबहादुर कार्कीलगायत उपस्थित थिए ।
