डुमरवाना क्रिकेट च्याम्पियनसिपमा मकवानपुरको विजयी सुरुवात
सिमरा: पाँचौ डुमरवाना क्रिकेट च्याम्पियनसिपमा मकवानपुर क्रिकेट संघले विजयी सुरुवात गरेको छ । जीतपुरसिमरा १५ स्थित प्रगतिशील खेल मैदानमा शनिबार भएको उद्घाटन खेलमा आयोजकलाई १०५ रनले पराजित गर्दै मकवानपुरले विजयी सुरुवात गरेको हो ।
घरेलु टोलिविरुद्व टस जितेर पहिले ब्याटिङ रोजेको मकवानपुरले निर्धारित २० ओभरमा पाँच विकेट गुमाउँदै १७० रन जोडेको थियो । मकवानपुरका लागि रामनरेश गिरीले ६२, विशाल फुयालले ४६ र गौरव खड्काले ४२ रन बनाए । आयोजकका योगराज शर्मा र विशाल चौलागाईंले समान दुई/दुई विकेट लिए ।
मकवानपुरले दिएको १७१ रनको लक्ष्य पछ्याउन मैदानमा उत्रिएको आयोजक ६५ रनमै समेटियो । आयोजकका दीपेश रायले २० र रोशन पोखरेलले १० रन जोडे । आयोजकलाई सस्तैमा समेट्ने क्रममा पीयूष शर्मा एक्लैले ६ विकेट लिँदा विशाल फुयाल र समीर चौलागाईंले दुई/दुई विकेट हात पारे । पीयूष खेलको प्लेयर अफ दि म्याच घोषित भए । पीयूषलाई जीतपुरसिमरा १४ की वडाध्यक्ष चयन गुरुङले पुरस्कृत गरेकी थिइन् ।
प्रगतिशील युवा क्लबको आयोजनामा सुरु भएको प्रतियोगितामा ६ टिमको सहभागिता रहेको छ । प्रतियोगिताको विजेताले एक लाख र उपविजेताले ५० हजार प्राप्त गर्नेछन् । प्रतियोगिता अन्तर्गत आइतबार चितवन र मकवानपुरबीच खेल हुनेछ ।
यसअघि प्रतियोगिताको उद्घाटन जीतपुरसिमरा उपमहानगरपालिकाका नगर प्रमुख राजन पौडेलले गरेका थिए । उद्घाटन कार्यक्रममा जीतपुरसिमरा १५ का वडाध्यक्ष रामप्रसाद लामिछाने, वडा नम्बर १४ की वडाध्यक्ष गुरुङ, साकुरा कोरियन भाषा केन्द्र सिमराका संचालक टीकाजंग थापा, क्लबका पूर्वअध्यक्ष कृष्ण नेपाल, युवा समाजसेवी बाबू पाण्डेलगायतको उपस्थिति रहेको थियो ।
क्लबका अध्यक्ष प्रदिप पोखरेलको अध्यक्षतामा सम्पन्न उद्घाटन समारोहको सहजीकरण सचिव बासु नेपालले गरेका थिए ।
