डुमरवाना क्रिकेट च्याम्पियनसीपः मकवानपुर फाइनलमा
सिमराः मकवानपुर क्रिकेट संघ बाराको डुमरवानामा जारी पाचौं डुमरवाना क्रिकेट च्याम्पियनसीपको फाइनलमा प्रवेश गरेको छ । समूह ‘ए’ मा रहेको मकवानपुर लगातार दुई खेलमा जित हात पार्दै फाइनलमा प्रवेश गरेको हो ।
प्रतियोगिताको उद्घाटन खेलमा आयोजकलाई १०५ रनले पराजित गरेको मकवानपुरले आइतबार दोस्रो खेलमा चितनवलाई २० रनले हराएको हो । दुई जीत हात पारेको मकवानपुरले शिर्ष स्थानमा रहँदै फाइनलमा स्थान सुरक्षीत गरेको हो ।
प्रगतिशील खेल मैदानमा टस जितेर पहिले ब्याटिङ गरेको मकवानपुरले १९.२ ओभरमा सम्पूर्ण विकेट गुमाएर एक सय ५५ रन बनाएको थियो । मकवानपुरका गोकुल अधिकारीले ५६ रन बनाउँदै अर्धशतक पूरा गरेका थिए । यसैगरी सुमन सुनारले ४८ रन बनाए ।
एक सय ५६ रनको लक्ष्य पछ्याउन मैदानमा उत्रिएको चितवनले २० ओभरमा ९ विकेट गुमाएर एक सय ३५ रन बनायो । चितवनका कप्तान आकाश थापाले ८३ रन जोडेपनि टिमको पराजय टार्न सकेनन् । मकवानपुरका शुभ कंसकारले दुई ओभरमा २४ रन खर्चिएर पाँच विकेट लिदाँ समिर चौलागाईंले दुई विकेट लिए ।
मकवानपुरका लागि अर्धशतक प्रहार गरेका गोकुल अधिकारीले प्लेयर अफ दि म्याच घोषित भए । उनलाई जीतपुरसिमरा उपमहानगरपालिका १५ का वडाध्यक्ष रामप्रसाद लामिछानेले पुरस्कृत गरेका थिए ।
प्रतियोगिता अन्तर्गत सोमबार समूह ‘ए’ को अन्तिम खेलमा आयोजक प्रगतिशील युवा क्लब र ईस्टन क्रिकेट एकेडेमीबीच खेल हुनेछ । समूह ‘बी’ को खेलहरु मंगलबारदेखि सुरु हुनेछन् । समूह ‘बी’ मा कलैया क्रिकेट क्लब, पर्सा क्रिकेट संघ र गौर क्रिकेट क्लब रहेका छन् ।
फाल्गुन ३ गतेसम्म आयोजना हुने प्रतियोगिताको विजेताले एक लाख र उपविजेताले ५० हजार नगद प्राप्त गर्नेछन् ।
