माओवादी केन्द्रले तोक्यो जिल्ला इन्चार्ज, बारामा श्रेष्ठलाई निरन्तरता
सिमराः नेकपा माओवादी केन्द्रले बारा इन्चार्जको जिम्मेवारीमा क्षेत्रबहादुर श्रेष्ठ (अनिल) लाई निरन्तरता दिएको छ । माओवादीको पदाधिकारी बैठकले आइतबार ७७ वटै जिल्लाको इन्चार्ज तोक्ने क्रममा बारामा श्रेष्ठलाई निरन्तरता दिएको हो ।
माओावादीको केन्द्रीय सदस्य श्रेष्ठ यसअघि पनि बारा इन्चार्जको जिम्मेवारीमा थिए । गोपाल ठाकुर भाषा आयोगको अध्यक्षमा नियुक्त भएपछि माओवादी केन्द्रले श्रेष्ठलाई जिल्ला इन्चार्ज बनाएको थियो । श्रेष्ठले यसअघि जिल्ला अध्यक्षको रुपमा समेत काम गरिसकेका छन् ।
यसैगरी माओवादी केन्द्रले पर्सामा बिजयकुमार महतो, रौतहटमा सुरेन्द्रकुमार जैसवाल, सर्लाहीमा अच्यूतम काफ्ले, महोत्तरीमा राजु खड्का, धनुषामा जोगकुमार बरबरिया यादव, सिरहामा अजयशंकर नायक र सप्तरीमा सूर्यनाथ यादवलाई जिल्ला इन्चार्ज तोकेको छ ।
माओवादी केन्द्रको पदाधिकारी बैठकले मातृक यादवलाई मधेस प्रदेशको इन्चार्ज तोकेको छ भने प्रलाद बुढाथोकी, विश्वनाथ साह, जोगकुमार बरबरिया यादव र महेन्द्र पासवानलाई प्रदेश सहइन्चार्जको जिम्मेवारी दिएको छ ।
