डुमरवाना क्रिकेट च्याम्पियनसिप: आयोजकको सान्त्वना जीत


eShilalekh

२८ माघ २०८१, सोमबार १८:२७

सिमरा: पाँचौ डुमरवाना क्रिकेट च्याम्पियनसिप प्रतियोगिता अन्तर्गत समूह `ए´ को अन्तिम खेलमा आयोजकले सान्त्वना जीत हात पारेको छ ।

जीतपुरसिमरा १५ स्थित प्रगतिशील खेल मैदानमा सोमबार सम्पन्न खेलमा आयोजकले इस्टन क्रिकेट एकेडेमी चितवनलाई पराजित गरेको हो ।

टस जितेर पहिले ब्याटिङ रोजेको चितवनले १३८ रन जोडेको थियो । चितवनका लागि अस्मित सुवेदीले ५६, शिरिष रखालले २२ र अभी यादवले २१ रन बनाएका थिए ।

चितवनले दिएको लक्ष्य पछ्याउन मैदानमा उत्रिएको आयोजकले आठ विकेट गुमाउँदै जीत हात पारेको थियो । आयोजकका लागि इमरान शेखले ३०, विशाल चौलागाईंले २७ र अजय पटेलले २५ रन बनाएका थिए । खेलको प्लेयर अफ दि म्याच आयोजकका विशाल चौलागाईं घोषित भए ।

समूह `ए´ बाट मकवानपुर क्रिकेट संघ फाइनलमा प्रवेश गरिसकेको छ । प्रतियोगिता अन्तर्गत मंगलवारदेखि समूह `बी´ का खेलहरु सुरु हुँदैछ । समुह `बी´ को पहिलो खेलमा कलैया क्रिकेट क्लब र गौर क्रिकेटबीच खेल हुनेछ ।

प्रगतिशिल यूवा क्लबको आयोजनामा जारी प्रतियोगिताको विजेताले एक लाख र उपविजेताले ५० हजार नगद प्राप्त गर्नेछन् ।

प्रतिक्रिया दिनुहोस्