डुमरवाना क्रिकेट च्याम्पियनसिपः उपाधिका लागि कलैया र मकवानपुर भिड्ने
सिमराः डुमरवाना क्रिकेट च्याम्पियनसिपको पाचौं संस्करणको उपाधिका लागि कलैया र मकवानपुर भिड्ने भएका छन् । प्रगतिशील खेल मैदानमा विहीबार भएको खेलमा पर्सालाई ९ रनले पराजित गर्दै कलैया फाइनलमा प्रवेश गरेको हो ।
टस हारेर पहिले ब्याटिङको निम्तो पाएको कलैयाले निर्धारित २० ओभरमा पाँच विकेट गुमाउँदै एक सय ५६ रन जोडेको थियो । कलैयाका लागि तृतराज दासले अविजित ४३ रन बनाए भने साहिल पटेलले ४२ रन जोडे ।
कलैयाले दिएको लक्ष्य पछ्याउन मैदानमा उत्रिएको पर्साले २० ओभरमा ९ विकेट गुमाएर एक सय ४७ रन मात्रै जोड्न सक्यो । पर्साका लागि रञ्जन यादवले ३९ र अल्फाज मन्सुरीले २२ रन बनाएका थिए । कलैयाका तृतराज दास खेलको प्लेयर अफ दि म्याच घोषित भए ।
कलैयाले अब उपाधिका लागि मकवानपुरसंग खेल्नेछ । समूह ‘ए’ को विजेता बन्दै मकवानपुर प्रतियोगिताको फाइनलमा प्रवेश गरिसकेको छ ।
जीतपुरसिमरा १५ स्थित प्रगतिशील यूवा क्लबको आयोजनामा जारी प्रतियोगिताको विजेताले एक लाख र उपविजेताले ५० हजार नगद प्राप्त गर्नेछन् ।
