कलैयास्थित सुधार गृहमा एकको मृत्यु, कुटपिटको आशंकामा सात जना पक्राउ
सिमराः बाराको कलैयास्थित सुधार गृहमा एक जनाको मृत्यु भएको छ । मृत्यु हुनेमा कलैया उपमहानगरपालिका ९ रामपुरका ३५ वर्षीय प्रदीपकुमार मण्डल रहेका छन् ।
कलैयास्थित नवजन्म सुधार गृहमा बस्दै आएका मण्डलको शुक्रबार बिहान मृत्यु भएको हो । सुधार गृहबाट राति अस्पताल लगिएका मण्डलको उपचारका क्रममा मृत्यु भएको जिल्ला प्रहरी कार्यालय बाराका निमित्त सूचना अधिकारी प्रहरी निरीक्षक बलराम श्रेष्ठले जानकारी दिएका छन् ।
मण्डलको कलैया प्रादेशिक अस्पतालमा मृत्यु भएको र शव शल्यपरीक्षणका लागि सोही अस्पतालमा राखिएको प्रहरी निरीक्षक श्रेष्ठले बताए । मण्डलको मृत्युको कारण खुल्न नसकेको र शल्यपरीक्षण रिपोर्टबाट मृत्युको कारण खुल्ने प्रहरी निरीक्षक श्रेष्ठले बताएका छन् ।
मण्डलको कुटपिट गरी हत्या गरेको आशंकामा प्रहरीले संचालकसहित सुधार गृहमा बस्दै आएका सात जनालाई नियन्त्रणमा लिएको छ । मृतकका परिवारले समेत मण्डलमाथि कुटपिट भएको दाबी गर्दै घटनाको अनुसन्धान गर्न प्रहरीसंग माग गरेका छन् । घटनाको अनुसन्धान गर्न मृतकका परिवारले प्रहरीसमक्ष जाहेरी समेत दिएका छन् ।
