जीतपुरसिमरा गोल्डकपको तयारी पूरा, जगदम्बा स्टील्स् मुख्य प्रायोजक
सिमरा: जगदम्बा जीतपुरसिमरा गोल्डकपको १२औं संस्करणको तयारी पूरा भएको छ । आयोजक नव जनजागृति युवा क्लबले सिमरामा पत्रकार सम्मेलनको आयोजना गर्दै प्रतियोगिताको तयारी पूरा भएको जानकारी गराएको हो ।
चैत्र १० गतेदेखी सुरु हुने प्रतियोगितामा ए डिभिजनका पाँच र मोफसलका पाँच गरी १० टिमको सहभागीता रहने भएको छ । आयोजक क्लबका अध्यक्ष रामचन्द्र लामाका अनुसार प्रतियोगितामा साविक बिजेता संकटा क्लब, एनआरटी क्लब, हिमालयन शेर्पा, फ्रेण्ड्स क्लब, एपिएफ एफसी, सुदुरपश्चिम ११, बिएफसी चितवन, बिजय युथ हेटौडा, वाग्मती युवा क्लब र आयोजक नव जनजागृति युवा सहभागी हुनेछन् ।
प्रतियोगिताको उद्घाटन खेल फ्रेण्ड्स क्लब र सुदुरपश्चिम ११ बीच हुनेछ । बढ्दो गर्मीका कारण फल्ड लाईटमा हुने प्रतियोगिताको बिजेताले १० लाख र उपबिजेताले पाँच लाख प्राप्त गर्नेछ । आयोजकले यस वर्ष प्रथम पुरस्कार राशीमा तीन लाख र द्धितीय पुरस्कारमा एक लाख पचास हजार बृद्धि गरेको छ । ११औं संस्करणमा प्रथम पुरस्कार सात लाख र द्धितीय पुरस्कार तीन लाख पँचास हजार थियो ।
चैत्र १९ गतेसम्म संचालन हुने प्रतियोगिताको सर्वोत्कृष्ठ खेलाडीले मोटरसाईकल वा स्कुटर प्राप्त गर्ने अध्यक्ष लामाले जानकारी दिए । प्रतियोगिता अवधीभरी उत्कृष्ट प्रदर्शन गर्ने विधागत पुरस्कारतर्फ गोलरक्षक, डिफेन्स, मिडफिल्ड, फरवार्ड, सर्वाधिक गोलकर्ता, प्रशिक्षकले जनही २० हजार नगद प्राप्त गर्नेछन् । आयोजकले यस वर्षपनि उदयीमान स्थानिय खेलाडीलाई १५ हजार नगदले पुरस्कृत गर्ने भएको छ ।
जीतपुरसिमरा उपमहानगरपालिकाको मुख्य सहयोगमा र जगदम्बा स्टील्स्को मुख्य प्रायोजनमा हुने प्रतियोगिताको लागत करिब ८३ लाख रहेको छ । ११औं संस्करणमा प्रतियोगिताको अनुमानित लागत ७० लाख ५५ हजार थियो । १०औं संस्करणसम्म सिमरा गोल्डकपको नामबाट संचालन हुदै आएको प्रतियोगिता पछिल्लो संस्करणबाट जीतपुरसिमराको नाममा रुपान्तरित भएको हो । स्थानिय सरकारका रुपमा रहेको जीतपुरसिमरा उपमहानगरपालिकाले प्रतियोगिता सम्पन्न गर्नका लागि मुख्य सहयोगीको भूमिकामा सहयोग गर्दै आएको छ । अघिल्लो संस्करणमा २० लाख आर्थिक सहयोग उपलब्ध गराएको उपमहानगरपालिकाले यस संस्करणमा २५ लाख उपलब्ध गराउने भएको छ ।
मोफसलकै प्रतिष्ठित प्रतियोगिताको रुपमा पहिचान स्थापित गरिसकेको प्रतियोगितालाई यस वर्षदेखी सिमरामा रहेको जगदम्बा स्टील्स्ले मुख्य प्रायोजन गर्ने भएको छ । प्रतियोगिताका बारेमा जानकारी दिन आयोजित पत्रकार सम्मेलनमा आयोजक क्लबका अध्यक्ष लामा र जगदम्बा स्टील्स्का कर्पोरेट भाईस प्रेसिडेण्ड कृष्णदत्त भट्टले सम्झौता पत्रमा हस्ताक्षर गरेका छन् ।
क्लबसंगको सम्झौतापछि पत्रकार सम्मेलनमा भट्टले राष्ट्रिय स्तरको प्रतियोगितामा सहकार्य गर्न पाँउदा आफूहरु उत्साहित रहेको बताए । क्लबका अध्यक्ष लामाले जगदम्बा स्टील्स्को साथले प्रतियोगिता आयोजना गर्न सहज भएको र आगामी दिनमा पनि सहयोग हुनेमा आफू विश्वस्त रहेको बताए ।
प्रतियोगितालाई सौर्य सिमेन्ट, रिद्धिसिद्धि सिमेन्ट, सुर्य नेपाल, हुलास स्टील्स्, क्याल ग्रुप, अमृत घ्युले सहप्रायोजकको रुपमा सहकार्य गर्ने भएका छन् । अखिल नेपाल फूटवल संघ (एन्फा) टुर्नामेन्ट सर्पोटरको रुपमा रहेको प्रतियोगिताको प्रोमोटरमा नेपाल पर्यटन बोर्ड रहेको छ । प्रतियोगिता अवधीभरका लागी वीरगन्जस्थित लुम्बिनी जनरल ईन्स्युरेन्सले खेलाडी, अफिसियल, स्वयंसेवक, पत्रकारलाई १० लाख र एक सय ३० जना दर्शकलाई पाँच लाखको विमा गर्ने भएको छ ।
प्रतियोगिता सफल पार्न सिमरास्थित युआर अटोमेटिक लन्ड्री, मुनसाईन टेक्नोलोजी, सुसप्त मेडिकल हल प्राविधिक सहयोगीको भूमिकामा रहने भएका छन् । पत्रकार सम्मेलनमा आयोजकले ११औं राष्ट्रिय खेलकुद मधेस प्रदेशमा आयोजना गर्न समेत माग गरेको छ ।
पत्रकार सम्मेलनमा जगदम्बा स्टील्स्का प्रशासन शाखा प्रमुख गोविन्द गुराँगाई, क्लबका पूर्वअध्यक्ष राजकुमार भट्टराई, सल्लाहकार दिनेश राई, सुमन भट्टराई, श्यामबाबु गुप्ता, भोला अधिकारी, शोभा कार्कीलगायत क्लबका पदाधिकारीको उपस्थिती रहेको थियो ।
