वीरगन्ज गोल्डकप फागुन १७ गतेदेखि, विजेताले ११ लाख पाउने
सिमराः वीरगन्ज गोल्डकपको दोस्रो संस्करण फागुन १७ गतेदेखि सुरु हुँदैछ । भेट्रान सिटी क्लबको आयोजनामा प्रतियोगिता हुन लागेको हो ।
फागुन २४ गतेसम्म हुने प्रतियोगितामा नेपाल र भारतका गरि आठ टिमको सहभागिता रहनेछ । प्रतियोगितामा साविक विजेता नेपाल पुलिस क्लब, मछिन्द्र फूटबल क्लब, संकटा फूटबल क्लब, गरवाल डाइमण्ड फुटबल क्लब दिल्ली, चर्च ब्वाइज युनाइटेड काठमाडौं, बागमती युथ क्लब, सलहेश फूटबल क्लब सिरहा र आयोजक वीरगन्ज युनाइटेड क्लबले सहभागिता जनाउने संयोजक सुबोधकुमार श्रीवास्तवले जानकारी दिए ।
प्रतियोगिताको विजेताले ११ लाख ११ हजार एक सय ११ र उपविजेताले पाँच लाख ५५ हजार पाँच सय ५५ नगद प्राप्त गर्ने संयोजक श्रीवास्तवले जानकारी दिएका छन् । प्रतियोगिताका लागि अस्थायी प्यारापिट निर्माण गरिएको छ । उक्त प्यारापिटमा दुई हजार दर्शक र मैदानमा बसेर तीन हजार दर्शकले खेलको मनोरञ्जन लिन सक्ने क्लबका उपाध्यक्ष सागर शमशेर राणाले पत्रकार सम्मेलनमा जानकारी दिए ।
प्रतियोगिता आयोजनाका लागि करिब एक लाख रकम खर्च हुने अनुमान गरिएको छ । प्रतियोगिताको मुख्य प्रायोजकमा वीरगन्ज महानगरपालिका रहेको छ ।
गत वर्ष सम्पन्न वीरगन्ज गोल्डकपको पहिलो संस्करणको उपाधि नेपाल पुलिस क्लबले उचालेको थियो ।
