सात स्वर्णसहित लायन्स तेक्वान्दो डोजाङ प्रथम
सिमराः सात स्वर्णसहित आयोजक लायन्स तेक्वान्दो डोजाङ बाराको डुमरवानामा शुक्रबार सम्पन्न जिल्लास्तरीय तेक्वान्दो प्रतियोगितामा प्रथम भएको छ । आयोजक डोजाङले सात स्वर्ण, तीन रजत र ६ कास्य पदक हात पारेको हो ।
यसैगरी चार स्वर्ण, चार रजत र चार कास्य जित्दै निजगढको नेत्रोदय तेक्वान्दो डोजाङले द्धितीय स्थान हासिल गरेको छ भने दुई स्वर्ण र एक रजत हात पार्दै स्मार्ट सिटी बागदेव तेक्वान्दो डोजाङ तृतीय भएको छ ।
प्रतियोगिताको उत्कृष्ट महिला फाइटर आयोजककी सिम्रन लामा घोषित भएकी छिन् भने उत्कृष्ट पुरुष फाइटरको पुरस्कार स्मार्ट सिटी बागदेव तेक्वान्दो डोजाङका सलिम अधिकारीले प्राप्त गरेको आयोजक डोजाङका प्रमुख सन्तोष गिरीले जानकारी दिएका छन् ।
प्रतियोगितामा बाराका ९ वटा तेक्वान्दो डोजाङका ८० खेलाडी सहभागी थिए । प्रतियोगितामा प्रथम, द्धितीय र तृतीय भएकासहित राष्ट्रिय विभूति सामुदायिक शिक्षा सदन डुमरवाना, कोल्हबी भैरव तेक्वान्दो डोजाङ, बारा निजगढ तेक्वान्दो डोजाङ, नेरामावि तेक्वान्दो डोजाङ सिंगौल, कलैया तेक्वान्दो डोजाङ र पथलैया तेक्वान्दो डोजाङका खेलाडीको सहभागिता रहेको थियो ।
यसअघि प्रतियोगिताको उद्घाटन जीतपुरसिमरा उपमहानगरपालिका वडा नम्बर १५ का वडाध्यक्ष रामप्रसाद लामिछानेले गरेका थिए । उद्घाटन समारोहमा जीतपुरसिमरा १४ की वडाध्यक्ष चयन गुरुङ, नेपाल तेक्वान्दो संघ मधेस प्रदेशका महासचिव राजकुमार लामा, तेक्वान्दो संघ बाराका अध्यक्ष चित्रबहादुर लामा, स्थानीय युवा कपिल खरेललगायत सहभागी थिए ।
उद्घाटन कार्यक्रममा आयोजकले नवौं राष्ट्रिय खेलकुदमा मधेस प्रदेशबाट सहभागिता जनाई कास्य पदक जितेका दुई खेलाडीलाई सम्मान गरेको थियो । सम्मानित हुनेमा विक्रान्त डंगोल र विकास तामाङ रहेका छन् ।
आयोजक डोजाङका अध्यक्ष गिरीको अध्यक्षतामा सम्पन्न कार्यक्रमको सहजीकरण प्रदीप गौतमले गरेका थिए ।
