वीरगन्ज गोल्डकपः सलहेशसंग संकटा स्तब्ध
सिमराः संकटा क्लबलाई स्तब्ध पार्दै सिरहाको सलहेश युवा क्लब वीरगन्ज गोल्डकपको सेमिफाइनलमा प्रवेश गरेको छ । आदर्शनगर रंगशालामा आइतबार भएको दोस्रो क्वाटरफाइनल खेलमा संकटालाई टाईब्रेकरमा ५–४ पन्छाउँदै सिरहा अन्तिम चारमा प्रवेश गरेको हो ।
निर्धारितमा समयमा दुवै टिमले गोलरहित बराबरी खेलेपछि खेल टाईब्रेकरमा धकेलिएको थियो । टाईब्रेकरमा सिरहाका लागि एम्बिओ एनिसेट, सुमित श्रेष्ठ, अमन लामा, शिशिर लेखी र जय गुरुङले गोल गरेका थिए ।
संकटाका लागि भने सुनिल खड्का, राजिव लोप्चन, छिरिङ लामा, सैम कार्लोसले गोल गरे भने राम थापामगरको प्रहारलाई सिरहाका गोलरक्षक विशाल सुनार बचाउ गरे । विशाल प्लेयर अफ दि म्याच घोषित भए । उनले १० हजार प्राप्त गरे ।
प्रतियोगिता अन्तर्गत सोमबार साविक विजेता नेपाल पुलिस क्लब क्लब र बागमती युथ क्लबबीच खेल हुनेछ । यसअघि शनिबार भएको उद्घाटन खेलमा वीरगन्ज युनाईटेड क्ल्बले गढवाल डायमण्ड फूटबल क्लब दिल्लीलाई १–० ले पराजित गर्दै सेमिफाइनलमा प्रवेश गरेको थियो ।
भेट्रान सिटी क्लब वीरगन्जको आयोजनामा जारी प्रतियोगितामा आठ टिमको सहभागिता रहेको छ । प्रतियोगिताको विजेताले ११ लाख ११ हजार एक सय ११ र उपविजेताले पाँच लाख ५५ हजार पाँच सय ५५ रुपैयाँ प्राप्त गर्नेछ ।
