दोस्रो वीरगन्ज गोल्डकपः साविक विजेता पुलिस फाइनलमा
वीरगन्जः साविक विजेता नेपाल पुलिस क्लब वीरगन्ज गोल्डकपको फाइनलमा प्रवेश गरेको छ । घरेलु टोली वीरगन्ज युनाईटेडलाई सडन डेथमा पराजित गर्दै पुलिस लगातार दोस्रो पटक फाइनलमा प्रवेश गरेको हो ।
आदर्शनगर रंगशालामा बुधवार भएको पहिलो सेमिफाइनल खेलमा दुवै टिमले गोलरहित बराबरी खेलेपछि खेल टाईब्रेकरमा धकेलिएको थियो । टाईब्रेकर पनि ३–३ को बराबरीमा सकिएपछि नतिजा सडन डेथमा निस्किएको हो ।
खेलको प्लेयर अफ दि म्याच पुलिसका गोलरक्षक अमित टमाटा घोषित भए । उनले १० हजार नगद प्राप्त गरे । प्रतियोगिता अन्तर्गत विहीबार दोस्रो सेमिफानल खेलमा मछिन्द्र फूटबल क्लब र सलहेश युवा क्लब सिरहा भिड्नेछन् ।
भेट्रान सिटी क्लबको आयोजनामा जारी प्रतियोगिताको विजेताले ११ लाख ११ हजार एक सय ११ र उपविजेताले पाँच लाख ५५ हजार पाँच सय ५५ रुपैया प्राप्त गर्नेछन् । प्रतियोगिताको फाइनल खेल फागुन २४ गते हुनेछ ।
