सामाजिक सञ्जाललाई गलतरुपमा प्रयोग नगरौंः विद्धान गुरुङ
सिमराः नेपाल तरुण दलका अध्यक्ष विद्धान गुरुङले सामाजिक सञ्जालको दुरुपयोग तत्काल रोकिन आवश्यक रहेको बताएका छन् । तरुण दल बाराले बुधबार कलैयामा आयोजना गरेको कार्यक्रममा बोल्दै अध्यक्ष गुरुङले नकारात्मक र गलत सन्देश फैलाउने गरि भईरहेको सामाजिक सञ्जालको प्रयोग रोकिन आवश्यक रहेको बताए ।
देशको व्यवस्था, राजनीतिक दल र नेताविरुद्ध नकारात्मक सन्देश फैलाउन सामाजिक सञ्जालमा भ्रामक र गलत कुरा लेख्ने काम भईरहेको भन्दै गुरुङले सामाजिक सञ्जालको दुरुपयोग नगर्न समेत अनुरोध गरेका छन् । गुरुङले तरुण दलका नेताकार्यकर्ताले नेपाली कांग्रेसको नीति, सिद्धान्त र इतिहासका विषयमा आमजनता सुसूचित गराउन निर्देशन दिए । जनताको समस्या र असन्तुष्टी बुझेर सकारात्मक कदमतर्फ अघि बढ्न तरुण दल सक्रिय हुनुपर्ने गुरुङको भनाई थियो ।
फरक प्रसंगमा गुरुङले अन्य देशको मुख्यमन्त्रीको तस्वीर राखेर राष्ट्रियताको कुरा गर्न नसुहाउने भन्दै गुरुङले देशको व्यवस्था फेर्ने विषय कल्पना भन्दा बाहिर रहेको बताएका छन् । केही व्यक्ति क्षणिक लाभ उठाउने मानसिकता बोकेर हिडिरहेको भन्दै गुरुङले ती चाहना पूरा नहुने बताए ।
गुरुङले तरुण दलको पाचौं महाधिवेशनको गर्ने निर्णय भईसकेको हुँदा सदस्यता वितरण, वडा, गाउँ र नगर अधिवेशन सम्पन्न गर्न सबै जिल्लालाई आग्रह गरे ।
कार्यक्रममा नेपाली कांग्रेसकी सहमहामन्त्री डिना उपाध्याय, नेपाली कांग्रेसकी केन्द्रीय सदस्य सरिता प्रसाई, कांग्रेस बाराका सभापति राजेश राय यादव, उपसभापति मनोज भट्ट, उपसभापति अमिरिलाल राउत पाल, क्षेत्र नं. २ का सभापति रामप्रवेश यादव, क्षेत्र नं. ४(२) का सभापति लोकेश सिंह, तरुण दल केन्द्रीय सदस्य सरिन घिमिरे, नेता कृष्णव्रत सिंह, सुमनकुमार भट्टराई, नेतृ कलावती पासवान, नारायणी रायमाझीलगायतको उपस्थिती रहेको थियो ।
कार्यक्रम तरुण दल बाराका सभापति दीपेन्द्र पटेल सभापतित्वमा सम्पन्न भएको थियो ।
