करैयामाई गाउँपालिकाद्वारा गरीब घरपरिवारको तथ्याङ्क सार्वजनिक
सिमराः करैयामाई गाउँपालिकाले गाउँपालिकाभित्र रहेका गरीब तथा विपन्न घरपरिवारको तथ्याङ्क सार्वजनिक गरेको छ ।
गाउँपालिकाका आठ वटा वडामा रहेका गरीब घरपरिवारको विवरण गाउँपालिकाका निमित्त प्रमुख प्रशासकीय अधिकृत वीरेन्द्र महतोले सार्वजनिक गरेका हुन् । अधिकृत महतोका अनुसार उक्त गाँउपालिकामा नौ सय ८६ विपन्न घरपरिवारको बसोबास रहेको छ ।
तथ्याङ्क अनुसार गाउँपालिकाको वडा नम्बर १ मा एक सय ३५ विपन्न घरपरिवारको बसोबास रहेको छ भने वडा नम्बर २ मा ७९ विपन्न घरपरिवार रहेका छन् ।
यसैगरी वडा नम्बर ३ मा ८०, वडा नम्बर ४ मा ८२, वडा नम्बर ५ मा एक सय ४५, वडा नम्बर ६ मा एक सय ३१, वडा नम्बर ७ मा दुई सय २४ र वडा नम्बर ८ मा दुई सय १० विपन्न घरपरिवारको बसोबास रहेको छ ।
भूमि व्यवस्था सहकारी तथा गरिबी निवारण मन्त्रालयद्वारा स्थानीय तहहरु संगको समन्वय र सहकार्यमा सञ्चालित गरीब परिवार तथा परिचय पत्र बितरण कार्यक्रम अन्तर्गत गरीब परिवारको पहिचानका लागि तथ्याङ्क सार्वजनिक गरिएको गाउँपालिकाले जनाएको छ ।
