फोनबाट धम्की दिँदै २० लाख रकम माग गर्ने मिश्र पक्राउ
सिमराः फोनबाट धम्क्याएर २० लाख रुपैयाँ माग्ने एक व्यक्तिलाई प्रहरीले शुक्रबार पक्राउ गरेको छ । पक्राउ पर्नेमा कलैया उपमहानगरपालिका ५ घुसुकपुरका ४८ वर्षीय मदन मिश्र रहेका छन् ।
सोही ठाउँका ३० वर्षीय डा. विकेशकुमार पाण्डेलाई फोन गरेर धम्की दिदै मिश्रले २० लाख रकम माग गरिरहेको प्रहरीको भनाई छ । मिश्रले पाण्डद्धारा संचालित ए.प्लस अस्पतालमा बम राखेको भन्दै त्रसिद पारेर रकम असुल्ने प्रयास समेत गरेको प्रहरी प्रवक्ता विजयराज पण्डितले जानकारी दिए ।
नेपाली नम्बरको सिमकार्डबाट फोन गरेर डा. पाण्डेलाई चैत २ गतेदेखि धम्क्याउँदै आएका मिश्रलाई प्रहरीले कलैया उपमहानगरपालिका १० स्थित शिवपुर चिउटाबाट पक्राउ गरेको हो । पाण्डेलाई पक्राउ गर्न भारत मोतिहारीका प्रहरीको समेत सहयोग रहेको बाराका प्रहरी प्रवक्ता पण्डितले बताएका छन् ।
पाण्डेलाई धम्क्याएर मिश्र भारतीय क्षेत्रमा लुक्दै आएका थिए । नेपाल प्रवेश गरेको सूचना पाएलगत्तै उनलाई पक्राउ गरेको प्रहरीको भनाई छ ।
