संचार क्षेत्रमाथिको आक्रमणविरुद्ध कलैयामा महासंघको प्रदर्शन
सिमराः राजसंस्थाको पुर्नस्थापनाको माग गर्दै काठमाडौंमा भएको आन्दोलनका सहभागीले संचारक्षेत्रमागि गरेको आक्रमणको विरोधमा कलैयामा प्रदर्शन गरिएको छ । नेपाल पत्रकार महासंघ बारा शाखाको आयोजनामा कलैयास्थित भरत चोकमा प्रदर्शन गरिएको हो ।
काठमाडौं तीनकुनेमा राजसंस्था समर्थकले एउटा घरमा आगो लगाउँदा पत्रकार सुरेश रजकको जलेर मृत्यु भएको थियो । यसैगरी आन्दोलनकारीले पत्रकार दिनेश गौतमको खुट्टा भाच्नुका साथै अन्नपूर्ण, कान्तिपुरजस्ता संचारगृहमा तोडफोड र आगजनी गरेका थिए ।
राजावादीको उक्त अराजकताविरुद्ध देशभरका पत्रकार यतिबेला आन्दोलित बनेका छन् । पत्रकार महासंघ बाराका उपाध्यक्ष पन्नालाल दासको अध्यक्षतामा सम्पन्न कार्यक्रममा केन्द्रीय सदस्य सिकेन्द्र पासवान, प्रदेश कोषाध्यक्ष अनिल गौरव, प्रेस चौतारी नेपालका पूर्व केन्द्रीय सचिव कमलकुमार उपाध्याय, नेपाल प्रेस युनियनका मधेस प्रदेश अध्यक्ष सत्यप्रसाद श्रेष्ठ, पत्रकार महासंघका सचिव पुष्पराज खतिवडा, सहसचिव दुष्यन्त चौधरी, पूर्व उपाध्यक्ष राकेश पाण्डे, पूर्वसचिव जयनारायण यादव, सदस्य जिउतप्रसाद यादव, नविन चौधरी, नरेश गुप्ता, प्रभु यादव, निमेश तिमिल्सिना, श्यामबाबु यादव, अप्सरा पुडासैनी, उमेशलाल दासलगायतको उपस्थिती रहेको थियो ।
यसैगरी नेपाल पत्रकार महासंघ पर्साको आयोजनामा वीरगन्जमा पनि विरोधका कार्यक्रम आयोजना गरिएको छ । घण्टाघरमा आयोजित कार्यक्रममा पत्रकारहरुले संचार क्षेत्रमामाथि भएको आक्रमण रोक्न माग गरेका थिए ।
