संचार क्षेत्रमाथिको आक्रमण रोक्न प्रेस चौतारीको माग
सिमराः प्रेस चौतारी नेपाल मधेस प्रदेश कमिटीले संचारकर्मीलाई सुरक्षित भएर काम गर्ने वातावरण निर्माण गर्न आग्रह गरेको छ । नेपाल पत्रकार महासंघको ७०औं स्थापना दिवसका अवसरमा शनिबार विज्ञप्ति जारी गर्दै प्रेस चौतारीले प्रेस स्वतन्त्रताको सम्मान गर्न र संचारकर्मीलाई सुरक्षित भएर काम गर्ने वातावरण निर्माण गर्न सरकारसंग आग्रह गरेको हो ।
राजसंस्था पुर्नस्थापनाको माग गर्दै शुक्रबार काठमाडौंमा भएको आन्दोलनका सहभागीले संचार क्षेत्रलाई लक्षित गर्दै गरेको आक्रमण निन्दनीय रहेको ठहर गर्दै प्रेस चौतारी नेपाल मधेस प्रदेश कमिटीका महासचिव दिवाकर भण्डारीले विज्ञप्तिमार्फत उक्त दिन नेपाली पत्रकारिताको इतिहासमा कालो दिनका रुपमा रहिरहने उल्लेख गरेका छन् । पत्रकार महासंघको ७०औं स्थापना दिवसका दिन देशभरका पत्रकार आन्दोलनमा उत्रनुपर्ने अवस्था आएकोमा महासचिव भण्डारीले दुःख व्यक्त गरेका छन् ।
आन्दोलनकारीले काठमाडौंको तीनकुनेस्थित एक घरमा आगजनी गर्दा जलेर मृत्यु भएका पत्रकार सुरेश रजकप्रति श्रद्धान्जली अर्पण गर्दै घाइते पत्रकार दिनेश गौतमको शिघ्र स्वास्थ्यलाभको कामना गरेका छन् । उनले अन्नपूर्ण मिडिया नेटवर्क, कान्तिपुर मिडिया ग्रुपलगायत विभिन्न संचारगृह र संचारसम्वद्ध सवारी साधनमाथि तोडफोड तथा आगजनीको भत्र्सना गरेका छन् ।
महासचिव भण्डारीले संचार क्षेत्रलाई लक्षित गरेर गरिएको यस्ता अपराधजन्य कार्यको अनुसन्धान गरी दोषीमाथि कडा कारवाहीको माग गर्दै संचार क्षेत्रमाथिको आक्रमण रोक्न तथा प्रेस स्वतन्त्रताको सम्मान गर्न सरकार र सम्बन्धित सरोकारवाला निकायसंग अनुरोध गरेका छन् ।
