जनकपुरमा प्रहरी र स्थानीयबीच झडप, यादवको हत्यारालाई कारवाही गर्न माग
जनकपुरः जनकपुरमा प्रहरी र स्थानीयबीच झडप भएको छ । जनकपुरधाम उप–महानगरपालिका २३ स्थित विन्धीमा प्रहरी र स्थानीयबीच झडप भएको हो ।
अंशु यादवको हत्यारालाई कारवाही गर्न माग गर्दै बिहान देखि सडक जाम गरेर आवत जावत ठप्प बनाएका विन्धीवासी र प्रहरी बीच झडप भएको छ ।
प्रहरीले जाम खोलाउन बल प्रयोग गरेपछि स्थानीयहरु आक्रोशीत भएका थिए । अवस्था गम्भीर बनेपछि प्रहरीले दर्जनौं राउण्ड आश्रु ग्यास प्रहार गरेका थिए । झडपमा दर्जनौं स्थानीय र प्रहरी घाइते भएका छन् ।
गत चैत्र २ गत्ते शनिबार साँझ ५ बजे होली खेल्ने क्रममा विवाद हुँदा स्थानीय लक्षमण महतोका छोरा २१ वर्षीय धर्मेन्द्र महतोले यादवमाथि छुरा प्रहार गरेका थिए । छाती, ढाड र पेटमा छुरा प्रहारबाट गम्भीर घाइते यादवको उपचारको क्रममा प्रादेशिक अस्पताल जनकपुरमा शनिबार साँझ करिब ६ बजे मृत्यु भएको थियो ।
प्रहरीले तत्कालै छुरासहित धर्मेन्द्रलाई पक्राउ गरेको थियो । यादवका परिवारजनले अन्य व्यक्तिको संलग्ता रहेको भन्दै उनीहरुलाई पनि हिरासतमा लिन आवाज उठाइरहेका छन् ।
