सर्लाहीका एक युवकको शव गाडिएको अवस्थामा फेला, हत्या गरेको आशंकामा ६ जना पक्राउ
सिमराः सर्लाहीका राहुल साहको हत्या प्रकरणमा संलग्न रहेको आरोपमा प्रहरीले ६ जनालाई पक्राउ गरेको छ ।
पक्राउ पर्नेमा भारतको बिहार घर भई दक्षिणढोका बस्ने २९ वर्षीय सुनिल शर्मा, सर्लाहीको चक्रघट्टा गाउँपालिका १ घर भएका २२ वर्षीय निपु मण्डल, सोही गाउँपालिका ६ का १८ वर्षीय विजय यादव, सोही स्थानका १८ वर्षीय करणकुमार महतो, २३ वर्षीय जोधन मण्डल र ४५ वर्षीय उत्तम मण्डल रहेका छन् ।
साहको शव चैत १५ गते गोकर्णेश्वर नगरपालिका वडा नम्बर ८ माकलबारीस्थित आरके मोटरसाइकल वर्कसपको पछाडि जमिनमा गाडिएको अवस्थामा फेला परेको थियो । उनि हाल काठमाडौंको गोकर्णेश्वर नगरपालिका वडा नम्बर ५ बाहुनधारामा बस्दै आएका थिए ।
साह चैत ११ गतेदेखि बेपत्ता भएका थिए । हराएको सूचना प्रहरी वृत्त बौद्धमा पुगेपछि प्रहरीले खोजतलास गरेको थियो । प्रहरीले प्रारम्भिक अनुसन्धानका आधारमा लेनदेनको विवादकै कारण उनको हत्या भएको निष्कर्ष निकालेको छ ।
पक्राउ परेकाहरूमाथि काठमाडौं जिल्ला अदालतबाट पाँच दिनको म्याद थप अनुमति लिई अनुसन्धान अघि बढाइएको प्रहरीले जनाएको छ ।
