क्यानको सेन्ट्रल कन्ट्रयाक्टमा नपरेका ९ खेलाडीलाई मधेश प्रदेशको साथ


eShilalekh

१९ चैत्र २०८१, मंगलवार १४:१४

सिमराः नेपाल क्रिकेट संघ (क्यान) को वार्षिक सेन्ट्रल कन्ट्रयाक्टमा नपरेका ९ खेलाडीसंग मधेश प्रदेश क्रिकेट संघले सम्झौता गरेको छ । संघले मधेश प्रदेश भित्रका आठ पुरुष र एक महिला खेलाडीसंग सम्झौता गरेको हो ।

संघले पुरुषतर्फ पवन सर्राफ, हरिशंकर साह, अभिषेक तिवारी, रोहन विक, विशाल पटेल, अरनिको यादव, प्रदीप पासवान, रञ्जित कुमार र महिलातर्फ रोजी कडारीसंग सम्झौता गरेको हो । उनिहरु क्यानले आगामी वर्षका लागि गर्न लागेको कन्ट्रयाक्ट सूचिमा छैनन् ।

सम्झौता भएका ९ खेलाडीलाई मधेश प्रदेश क्रिकेट संघले मासिक १० हजार रुपैया उपलब्ध गराउनेछ । उक्त रकम प्रत्येक तीन महिनामा खेलाडीलाई उलपब्ध गराईने संघका कोषाध्यक्ष सुवास जयसवालले जानकारी दिए ।

क्यानले आगामी वर्षका लागि पाँच तह वर्गिकरण गर्दै ३३ जना पुरुष खेलाडीसंग सेन्ट्रल कन्ट्रयाक्ट गर्ने भएको छ । उक्त कन्ट्रयाक्ट अन्तर्गत ग्रेड ‘ए’ मा कप्तान रोहित पौडेल, सन्दीप लामिछाने, दीपेन्द्र सिंह ऐरी, सोमपाल कामी र वीरगन्जका आशिफ शेख छन् ।

गेड ‘बी’ मा मधेश प्रदेशका कप्तान समेत रहेका राष्ट्रिय टोलीका अलराउण्डर बाराका अनिलकुमार साहसहित पाँच खेलाडी छन् । उक्त ग्रेडमा साहसहित करण केसी, कुशल भूर्तेल, गुलशन झा र ललित राजवंशी छन् ।

ग्रेड ‘सी’ मा वीरगन्जका आरिफ शेखसहित सन्दीप जोरा, भीम सार्की र कुशल मल्ल छन् भने ग्रेड ‘डी’ मा जय ट्रफीमा उत्कृष्ट प्रदर्शन गरेका साहब आलमसहित सागर ढकाल, लोकेश बम, आकाश चन्द, विवेक यादव, सूर्य तामाङ, रिजन ढकाल, देव खनाल, बशिर अहमद, प्रतिश जिसि, अभिनाश बोहोरा र मयन यादव छन् । उदयीमान खेलाडीमा अर्जुन घर्ती, हेमन्त धामी, दीपेश कंडेल, रुपेश सिंह, अर्जुन कुमाल, शुभ कंसकार र सन्तोष यादव रहेका छन् ।

ग्रेड ‘ए’ का खेलाडीले मासिक एक लाख, ग्रेड ‘बी’ का खेलाडीले मासिक ७० हजार, ग्रेड ‘सी’ का खेलाडीले मासिक ५५ हजार, ग्रेड ‘डी’ का खेलाडीले मासिक ३५ हजार र उदयीमान खेलाडीले मासिक २५ हजार प्राप्त गर्नेछन् ।

महिलातर्फ क्यानले चार तह वर्गिकरण गर्दै १९ जना खेलाडीसंग सेन्ट्रल कन्ट्रयाक्ट गर्न लागेको छ । कन्ट्रयाक्ट अन्तर्गत ग्रेड ‘ए’ मा कप्तान इन्दु बर्मा, पूजा महतो, रुबिना क्षेत्री र सिता राना मगर छन् । गेड ‘बी’ कबिता जोशी मात्रै छिन् भने ग्रेड ‘सी’ कबिता कुवँर र सम्झना खड्का छिन् ।

ग्रेड ‘डी’ मा बाराकी अलिशा यादव, पर्साकी साना प्रविनसहित बिन्दु रावल, रिया शर्मा, सीमाना केसी, सावित्री धामी, रोमा थापा, इश्वरी बिष्ट, कृष्मा गुरुङ, जोत्स्निका मरासैनी, रचना चौधरी र मनिषा उपाध्याय छन् ।

महिलातर्फ ग्रेड ‘ए’ मा परेका खेलाडीले ५० हजार, ग्रेड ‘बी’ का खेलाडीले ३५ हजार, ग्रेड ‘सी’ का खेलाडीले २५ हजार र ग्रेड ‘डी’ मा २० हजार मासिक पाउनेछन् ।

प्रतिक्रिया दिनुहोस्