वीरगन्जको बालसुधार गृहमा बाल कैदीबन्दीहरूद्वारा तोडफोड
सिमराः वीरगन्जको बालसुधार गृहमा मंगलबार बाल कैदीबन्दीहरूले तोडफोड गरेका छन् ।
खाना र बासको समस्याबारे असन्तुष्ट बाल कैदीबन्दीहरूले होहल्ला गर्दै तोडफोड सुरु गरेपछि तनावपूर्ण स्थिति सिर्जना भएको हो । पर्साका प्रहरी उपरीक्षक गौतम मिश्रको नेतृत्वमा प्रहरी टोलीले घटनास्थलमा पुगेर स्थिति नियन्त्रणमा लिएको थियो ।
बालसुधार गृहमा विभिन्न कसूरमा संलग्न १२७ जना बाल कैदीबन्दीहरू रहेका छन् । उनीहरूको असन्तुष्टिलाई सम्बोधन गर्न पर्साका प्रमुख जिल्ला अधिकारी गणेश अर्याल, प्रहरी उपरीक्षक गौतम मिश्र, प्रहरी नायब उपरीक्षक किशोर लम्साल र अन्य अधिकारीहरू सक्रिय भएका थिए ।
प्रमुख जिल्ला अधिकारी गणेश अर्यालले बाल कैदीबन्दीहरूको समस्या समाधान गर्ने प्रतिबद्धता जनाउँदै स्थिति शान्त भएको प्रहरीले जनाएको छ ।
यसअघि २०८० भदौ २६ गते बालसुधार गृहमा बाल कैदीबन्दीहरू बीच आपसी झडप हुँदा ११ जना बाल कैदीबन्दी र ३ जना प्रहरी घाइते भएका थिए ।
