जीतपुरसिमरा गोल्डकपको १५औं संस्करण चैत २२ गतेदेखि, टिकट काट्ने दर्शकलाई उपहार नै उपहार
सिमरा: मोफसलकै प्रतिष्ठित फूटबल प्रतियोगिता जीतपुरसिमरा गोल्डकपको १५औं संस्करण चैत २२ गतेदेखि सुरु हुने भएको छ । आयोजक नव जनजागृति युवा क्लबले मंगलबार पत्रकार सम्मेलनको आयोजना गर्दै प्रतियोगिताबारे जानकारी गराएको हो ।
सिमरा रंगशालामा आयोजना हुने प्रतियोगितामा यसपटक आठ टिमको सहभागिता रहनेछ । प्रतियोगितामा साविक विजेता नेपाल पुलिस क्लब, साविक उपविजेता मछिन्द्र फूटबल क्लबसहित फ्रेण्ड्स क्लब, हिमालयन शेर्पा क्लब, एन्फा मकवानपुर, सलहेश युवा क्लब सिरहा, हानामी बिएफसी चितवन र आयोजकको सहभागिता रहने क्लबका अध्यक्ष रामचन्द्र लामाले जानकारी दिए ।
जीतपुरसिमरा उपमहानगरपालिकाको मुख्य सहयोगमा आयोजना हुन लागेको प्रतियोगिताको उपाधी विजेताले १० लाख र उपविजेताले पाँच लाख नगद प्राप्त गर्नेछन् । प्रतियोगिताको सर्वोत्कृष्ट खेलाडीलाई इलेक्ट्रोनिक्स स्कुटर प्रदान गरिनेछ । सिमरामा रहेको भिएक्सएल एजुकेशनले उक्त स्कुटर प्रायोजन गर्नेछ ।
विधागततर्फ उत्कृष्ट गोलरक्षकलाई केटीएम कन्सल्टिङ, उत्कृष्ट प्रशिक्षकलाई केएनडी लेबर सप्लायर र सर्वाधिक गोलकर्तालाई ग्रेस ईन्टरनेशलले जनही २५ हजार उपलब्ध गराउने अध्यक्ष लामाले बताए । प्रतियोगिताको उदयीमान खेलाडीले १५ हजार नगद प्राप्त गर्नेछन् भने प्रत्येक खेलको प्लेयर अफ दि म्याचलाई जनही १० हजार नगदले पुरस्कृत गरिनेछ ।
उदयीमान खेलाडीका लागि हाल अष्ट्रेलियामा रहेका नेपाली राष्ट्रिय टोलीका पूर्व खेलाडी रवी पासवानले नगद राशी उपलब्ध गराउने भएका छन् । सिमरा रंगशालाबाट नेपाली फूटबलमा उदाएका रवी नेपालको विभिन्न क्लबमा आवद्ध हुँदै हाल अष्ट्रेलियामा व्यवसायिक फूटबल खेलिरहेका छन् ।
यसैगरी प्रत्येक खेलको प्लेयर अफ दि म्याच घोषित हुने खेलाडीलाई ग्रिन इनर्जी नेपालले प्रायोजन गर्ने भएको छ । उक्त संस्थाका संचालक युवा व्यवसायी शैलश शाह ठकुरीले खेलाडीको हौसला बढाउन र प्रतियोगिता सफल बनाउन आफूले सहयोग गरेको बताएका छन् ।
प्रतियोगिताको टिकेटिङ पार्टनरको रुपमा रहेको सुरक्षा मोबाइलले टिकट काटेर खेल हेर्ने दर्शकमध्ये एक जनालाई प्रत्येक दिन स्मार्ट घडी उपलब्ध गराउने भएको छ भने हिमालयन कफी सप र ए.के. सप्लायर्सले आकर्षक उपहार प्रदान गर्ने घोषणा गरेका छन् । प्रतियोगितामा हुलास स्टील, नेपोभिट टायल्स, सूर्य नेपाल प्रा.लि., सगरमाथा इन्स्योरेन्स, युआर अटोमेटिक लण्ड्री, एलएस न्यूरो अस्पताल, स्टार अस्पताल, सुसप्त मेडिकललगायतले सहयोग गरेका छन् ।
होटल तथा पर्यटन व्यवसायी संघले प्रतियोगिता अवधीभर फुड फेस्टिभल र सेमिफाइनको दुई खेलको समयमा राष्ट्रिय कलाकारको उपस्थितीमा सांस्कृतिक कार्यक्रमको आयोजना गर्ने तयारी गरेको छ । संघका कार्यबाहक अध्यक्ष शम्भु खड्गीले दर्शकलाई लक्षित गरेर यसपटक फूड फेस्टिभलसंगै सांस्कृतिक कार्यक्रमलाई समेत जोड्न लागिएको बताए ।
