वीरगन्जको बालसुधार गृहको अवस्था सुधारका लागी सरोकारवालाहरुद्वारा १३ बुँदे निर्णय
सिमराः वीरगन्जको बालसुधार गृहमा रहेका बालबालिकाहरूकालागी बुधबार सरोकारवालाहरुको बैठकले १३ बुँदे निर्णय गरेको छ । पर्साका प्रमुख जिल्ला अधिकारी गणेश अर्यालको अध्यक्षतामा जिल्ला प्रशासन कार्यालयमा बसेको बैठकले बालबालिको हितलाई ध्यानमा राख्दै महत्वपूर्ण निर्णयहरू गरेको हो ।
बैठकका निर्णय अनुसार बाल सुधार गृह परिसरमा मर्मत गर्नुपर्ने संरचना र सामग्रीहरूलाई एक साताभित्रै सुधार गृह मर्मत गरी अद्यावधिक गर्ने भएको छ ।
यसैगरी, बालबालिकाहरूको लागि इन्टरनेटको सुविधा अत्यावश्यक भएकोले वाईफाई जडान गरिने, ल्यापटप र कम्प्युटरहरूको तत्काल मर्मत सम्भार गरिने निर्णय गरेको छ ।
बालबालिकाहरूको मानसिक स्वास्थ्यलाई ध्यानमा राख्दै बाल सुधार गृहले अबदेखि कम्तीमा साताको एक पटक मनोसामाजिक परामर्श अनिवार्य रूपमा उपलब्ध गराउने भएको छ । गर्मी मौसमलाई मध्यनजर गर्दै आवश्यक संख्यामा पंखा र खानेपानीको व्यवस्थापनका लागि जिल्ला प्रशासन कार्यालयले समन्वय गर्ने भएको छ ।
त्यसैगरी, क्षयरोगबाट सङ्क्रमित बालकको उपचार लगायतका समस्या समाधानका लागि वीरगन्ज महानगरपालिकासँग समन्वय गरी आवश्यक व्यवस्था मिलाइने भएको छ ।
बन्दीहरूलाई दिइने सीधावापतको रकम समयमै भुक्तानीका लागि बाल सुधार गृहले आवश्यक विवरण समयमै कारागार कार्यालयमा पेश गर्ने व्यवस्था मिलाइने निर्णय भएको छ । बालबालिकाहरूको शिक्षालाई निरन्तरता दिन पाठ्यपुस्तक र अन्य सन्दर्भ सामग्रीको व्यवस्थापन लगायतका सरोकारवालाहरूसँग समन्वय गरी शिक्षा विकास तथा समन्वय इकाइ कार्यालयले उपलब्ध गराउने भएको छ ।
ज्ञान आर्जनका लागि पुस्तकालयको व्यवस्था गरी सञ्चालन गर्न बाल सुधार गृह प्रशासकले आवश्यक स्थानको प्रबन्ध मिलाउने भएका छन् । पढ्न इच्छुक बालबालिकाहरूका लागि तहगत रूपमा शिक्षकको व्यवस्थापन खुला विद्यालयमार्फत वीरगंज महानगरपालिकाले गर्ने भएको छ ।
खानेपानीको समस्यालाई दीर्घकालीन रूपमा समाधान गर्न बाल सुधार गृह परिसर नजिकै रहेको डिप बोरिङ्गबाट पाइप जडान गरी नियमित रूपमा खानेपानीको व्यवस्थापन वीरगंज महानगरपालिकाले मिलाउने भएको छ । रातको समयमा बत्ती जाने समस्यालाई हल गर्न वैकल्पिक ऊर्जाको व्यवस्थापनका लागि वीरगन्ज उद्योग वाणिज्य संघलाई अनुरोध गरिने भएको छ ।
बाल सुधार गृहको सुरक्षा व्यवस्थालाई थप प्रभावकारी बनाउन आवश्यक पर्ने सिसिटिभि क्यामेरा जडान गर्ने व्यवस्था वीरगंज महानगरपालिकाले गर्ने भएको छ । आगामी दिनमा अनुगमन र निरीक्षणलाई थप व्यवस्थित र प्रभावकारी बनाइने र अनाधिकृत व्यक्तिहरूको प्रवेशलाई निरुत्साहित गरिने भएको छ ।
