डुमरवाना भेट्रान फूटबल प्रतियोगिताको दोस्रो संस्करण चैत २३ गतेदेखि

सिमराः डुमरवाना भेट्रान फूटबल प्रतियोगिताको दोस्रो संस्करण चैत २३ गतेदेखि सुरु हुने भएको छ । आयोजक डुमरवाना भेट्रान क्लबले बुधबार पत्रकार सम्मेलनको आयोजना गर्दै प्रतियोगिता बारे जानकारी दिएको हो ।
जीतपुरसिमरा उपमहानगरपालिका १५ स्थित डुमरवाना खेल मैदानमा हुने प्रतियोगितामा बारा, पर्सा, मकवानपुर, सर्लाहीका १२ टिमको सहभागिता रहनेछ । आयोजक क्लबका सचिव लालबहादुर गुरुङका अनुसार प्रतियोगितामा लक्ष्मीनाथ भेट्रान सर्लाही, विकासशील भेट्रान सिमरा, त्रिशुल भेट्रान बकुलिया, बगही भेट्रान पर्सा, खैरवा भेट्रान, नागस्वोती भेट्रान हेटौंडा, सिमरा भेट्रान, नव जनजागृति भेट्रान क्लब, निजगढ भेट्रान, वीरगन्ज भेट्रान र आयोजकका दुई टिमको सहभागिता रहनेछ ।
चैत ३० गतेसम्म आयोजना हुने प्रतियोगिताको विजेताले एक लाख र उपविजेताले ५० हजार प्राप्त गर्नेछन् । प्रतियोगिताको सर्वाधिक गोलकर्तालाई पाँच हजार, उत्कृष्ट खेलाडी र गोलरक्षकलाई जनही दुई हजार पाँच सय रुपैयाँले पुरस्कृति गरिने आयोजक क्लबका सल्लाहकार संयोजक राजु तिमिल्सिनाले बताए ।

प्रतियोगितालाई जीतपुरसिमरा उपमहानगरपालिकाले एक लाख र वडा नं. १५ को कार्यालयले एक लाख रुपैयाँ सहयोग गर्ने भएको छ । यसैगरी मौसम चियापत्ती, प्रोग्रेश एकेडेमी, सन्तुष्टी होटल, शिवशक्ती घ्यूलगायतले प्रतियोगितालाई सहयोग गरेका छन् ।
क्लबका अध्यक्ष मनोज चौधरीको अध्यक्षतामा सम्पन्न पत्रकार सम्मेलनमा वडाध्यक्ष रामप्रसाद लामिछाने, वडासदस्य रामेश्वर चौधरी, मनमाया घले, लोकतान्त्रिक खेलकुद संघ बाराका अध्यक्ष ओम (बाबु) पाण्डे, मौसम चियापत्तीका कन्ट्री मेनेजर इश्वर दवाडी, कपिल लामिछाने, डिलर प्रमुख शिशुपाल चौधरीलगायतको उपस्थिती रहेको थियो ।
पत्रकार सम्मेलनको सहजीकरण संचारकर्मी प्रदीप गौतमले गरेका थिए भने स्वागत मन्तव्य भरत पौडेलले गरेका थिए । प्रतियोगिताको मधेस स्पोर्ट्स खेलकुद पेजले प्रत्यक्ष प्रसारण गर्ने भएको छ ।