वीरगन्जबाट खैरो हेरोइनसहित चार भारतीय नागरिक पक्राउ
वीरगन्जः प्रहरीले दुई सय २० ग्राम लागूऔषध खैरो हेरोइन (ब्राउन सुगर) सहित वीरगन्जबाट चार भारतीय नागरिकलाई पक्राउ गरेको छ । रक्सौलबाट नेपालतर्फ आउँदै गरेका उनिहरुलाई प्रहरी चौकी इनर्वाको टोलीले रजतजयन्ती सडक क्षेत्रबाट पक्राउ गरेको हो ।
पक्राउ परेका उनिहरुको साथबाट दुई सय २० ग्राम लागूऔषध खैरो हेरोइन बरामद भएको पर्सा प्रहरीका प्रवक्ता किशोर लम्सालले जानकारी दिएका छन् । पक्राउ पर्नेमा सीमावर्ती शहर रक्सौलका ३७ वर्षीय कृष्ण कुमार, ३८ वर्षीय सुधिर कुमार, ४८ वर्षीय अमित कुमार र स्कोरपियो चालक २७ वर्षीय राजा कुमार रहेका छन् ।
उनिहरुलाई पर्सा जिल्ला अदालतबाट पाँच दिन म्याद थप गरी हिरासतमा राखेर अनुसन्धान थालिएको प्रवक्ता लम्सालले बताए । प्रहरीले उनिहरु सवार भारतीय नम्बरको स्कोरपियो समेत नियन्त्रणमा राखेको छ ।
